ព្រះសីហនុ - ឯកឧត្តម គិត ច័ន្ទគ្រឹស្នា ទីប្រឹក្សារដ្ឋមន្រ្ដីក្រសួងបរិស្ថាន និងជានាយកគម្រោងស្តីពីការទប់ស្កាត់សំណល់ប្លាស្ទិកសមុទ្រនៅកម្ពុជា មានប្រសាសន៍ថា សហគមន៍ជាដៃគូសំខាន់ដោះស្រាយបញ្ហាប្លាស្ទិកនៅតាមតំបន់ឆ្នេរសមុទ្រ ។ ឯកឧត្តម បានលើកឡើងក្នុងពិធីសម្ពោធកម្មវិធីដំណោះស្រាយសហគមន៍ដើម្បីឆ្នេរសមុទ្រគ្មានប្លាស្ទិក ប្រព្រឹត្តទៅនៅសណ្ឋាគារឯករាជ្យ ខេត្តព្រះសីហនុ នាព្រឹកថ្ងៃព្រហស្បតិ៍កន្លងទៅ ។

ឯកឧត្តម គិត ច័ន្ទគ្រឹស្នា នាយកគម្រោងស្តីពីការទប់ស្កាត់សំណល់ប្លាស្ទិកសមុទ្រនៅកម្ពុជា មានប្រសាសន៍ថា ការផ្សព្វផ្សាយ និងលើកទឹកចិត្តតាមសហគមន៍ឱ្យពួកគាត់ផលិតសម្ភារជំនួសការប្រើប្រាស់ប្លាស្ទិក និងកែច្នៃប្លាស្ទិកប្រើប្រាស់ឡើងវិញជាផ្នែកមួយដ៏សំខាន់ នៃការកាត់បន្ថយការប្រើប្រាស់ប្លាស្ទិក ។

“រាជរដ្ឋាភិបាល និងក្រសួងបរិស្ថានបានរៀបចំក្របខ័ណ្ឌគោលនយោបាយ យុទ្ធសាស្រ្ត ព្រមទាំងច្បាប់ និងគតិយុទ្ធនានា ដើម្បីគ្រប់គ្រងសំរាម សំណល់រឹងទីប្រជុំជន ប៉ុន្តែដៃគូរអនុវត្តន៍ និងប្រជាពលរដ្ឋយើងត្រូវចូលរួមទាំងអស់គ្នា កុំឱ្យបញ្ហាប្លាស្ទិកនេះបន្សល់ទុកដល់អ្នកជំនាន់ក្រោយៗ” ។ នេះជាការបញ្ជាក់របស់ឯកឧត្តម គិត ច័ន្ទគ្រឹស្នា ។ 

គួររម្លឹកថា ពិធីសម្ពោធកម្មវិធីដំណោះស្រាយសហគមន៍ដើម្បីឆ្នេរសមុទ្រគ្មានប្លាស្ទិក មានវត្តមានចូលរួមពីតំណាងរដ្ឋបាលខេត្តព្រះសីហនុ មន្ទីរបរិស្ថានខេត្ត លោកស្រី Moeko Saito-Jensen អ្នកជំនាញគោលនយោបាយបរិស្ថានរបស់កម្មវិធីអភិវឌ្ឍន៍សហប្រជាជាតិ (UNDP) លោក Barak Ekshtein នាយកប្រតិបតិ្ត TONTOTON លោក Kristin Hughes ប្រធាន Global Plastic Action Partnership (GPAP) ។ 

សូមជម្រាបថា ក្រុមហ៊ុន TonToTon ជាក្រុមហ៊ុនលក់ឥណទានប្លាស្ទិក ដោយសហការជាមួយប្រជាសហគមន៍ក្នុងខេត្តព្រះសីហនុ ប្រមូលប្លាស្ទិកតាមតំបន់ឆ្នេរដើម្បីយកទៅដុតនៅក្រុមហ៊ុន Chip Mong Insee Cement ក្នុងខេត្តកំពត ។ តកម្មវិធីនេះក្រសួងបរិស្ថានរំពឹងថា អាចប្រមូលប្លាស្ទិកបានជាង ៣ពាន់តោនក្នុងដំណាច់ឆ្នាំ២០២២ ៕