ប្រជាសហគមន៍រំពឹងថាផ្សារសហគមន៍កសិកម្មកសិករព្រៃវិហារនឹងជួយនាំកសិផលទៅដល់ទីផ្សារកាន់តែទូលំទូលាយ
កំពង់ស្ពឺ - ផ្សារសហគមន៍កសិកម្មកសិករព្រៃវិហារ នៅភូមិចំការដូង ឃុំព្រៃវិហារ ស្រុកគងពិសី ខេត្តកំពង់ស្ពឺ បានដាក់សម្ភោធឱ្យប្រើប្រាស់ជាផ្លូវការ នៅថ្ងៃទី២៧ ខែកក្កដានេះ ដោយមានការចូលរួមពីលោក ចែម ភិនរិទ្ធី អភិបាលស្រុកគងពិសី និងលោកបណ្ឌិត ញ៉ែម សារ៉េត នាយកប្រចាំប្រទេសអង្គការហេហ្វឺអន្តរជាតិកម្ពុជា អាជ្ញាធរឃុំ និងប្រជាពលរដ្ឋនៅក្នុងសហគមន៍។
លោក ម៉ិញ សាវឿន ប្រធានសហគមន៍កសិករព្រៃវិហារ បានបញ្ជាក់ថា គោលបំណងបង្កើតផ្សារសហគមន៍នេះ ដើម្បីរៀបចំជាទីកន្លែងប្រមូលផ្តុំកសិផលដឹកជញ្ជូនទៅកាន់ទីផ្សារក្នុងតំបន់ និងទីផ្សារនៅភ្នំពេញ ព្រមទាំងប្រមូលទិញកសិផលរបស់សមាជិក និងធ្វើជាកន្លែងលក់ធាតុចូលកសិកម្ម និងផ្តល់សេវាកម្មនានាដល់សមាជិកក្នុងសហគមន៌ទាំងមូល។
បើតាមអង្គការហេហ្វឺអន្តរជាតិកម្ពុជា បានឱ្យដឹងថា ផ្សារសហគមន៍កសិកម្មកសិករព្រៃវិហារ ជាផ្សារមួយក្នុងចំណោមផ្សារទាំង ០៦កន្លែង ដែលបានគាំទ្រដោយគម្រោងកម្មវិធីភីភីអ៊ិនភី-PPNP ។ ក្នុងនោះសហគមន៍បានទទួលបានការគាំទ្រជាច្រើនពីអង្គការហេហ្វឺកម្ពុជា រួមមាន ការបណ្តុះបណ្តាលដល់ក្រុមប្រឹក្សាសហគមន៍ និងសមាជិកក្នុងការពង្រឹងគ្រប់គ្រង និងការធ្វើអាជីវកម្មរបស់សហគមន៍ បច្ចេកទេសចិញ្ចឹមមាន់និងបន្លែ និងមូលនិធិផ្សេងៗជាដើម។
គួរបញ្ជាក់ថា សហគមន៍ព្រៃវិហារបានបង្កើតឡើងថ្ងៃទី២០ ខែឧសភា ឆ្នាំ២០១៧ ក្រោមជំនួយមូលនិធិរបស់អង្គការហេហ្វឺអន្តរជាតិកម្ពុជា។ សហគមន៍ចាប់ផ្តើមដំណើរការដោយមានការចូលរួមពីសមាជិកចំនួន ១២៥គ្រួសារ ភាគហ៊ុនដែលចាប់ផ្តើមដោយភាគហ៊ុនសរុបចំនួន ១៥៦២ដុល្លារ ហើយមុខរបរដំបូងគឺមានឥណទានកសិកម្មតែមួយមុខតែប៉ុណ្ណោះ ។
គិតមកត្រឹមដល់ឆ្នាំ២០២២ ដោយមានអន្តរាគមន៍ជាបន្តបន្ទាប់ពីរាជរដ្ឋាភិបាល តាមរយៈមន្ទីរនិងការិយាល័យពាក់ព័ន្ធនានា អង្គការជាតិ និងអន្តរជាតិនានា ទាំងចំណេះដឹងធនធាន និងជាពិសេសក្រោមមូលនិធិរបស់អង្គការហេហ្វឺអន្តរជាតិកម្ពុជា សហគមន៍មានសមជិកសរុបចំនួន ២៩៤នាក់ ភាគហ៊ុនសរុបមានចំនួន ១៧.១៦៦ ដុល្លារ និងសរុបដើមទុនមានចំនួន ៧៤.៣៨៣ដុល្លារ៕
អត្ថបទថ្មីៗ
អត្ថបទពេញនិយម
