ព្រៃវែង ត្រៀមប្រកាសជាខេត្តទទួលបានODF បន្ទាប់ពីស្វាយរៀង
ភ្នំពេញ៖ ប្រសិនបើគ្មានការប្រែប្រួលនេះទេ ខេត្តព្រៃវែង គឺជាខេត្តទី២ នឹងត្រូវប្រកាសជាខេត្តបញ្ឈប់ការបន្ទោបង់ពាសវាលពាសកាល(ODF) នៅដើមខែកញ្ញា ឆ្នាំ២០២២ខាងមុខ បន្ទាប់ពីខេត្តស្វាយរៀង ដែលជាខេត្តដំបូងគេនៅកម្ពុជាដែលទទួលបាន ODF ។ នេះបើតាមការបញ្ជាក់របស់ឯកឧត្តម ជ្រុន ថេរ៉ាវ៉ាត់ រដ្ឋលេខាធិការនិងជាអ្នកនាំពាក្យក្រសួងអភិវឌ្ឍន៍ជនបទ នៅក្នុងសន្និសីទសារព័ត៌មានដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល កាលពីព្រឹកថ្ងៃទី០១ ខែសីហា ឆ្នាំ២០២២។
ឯកឧត្តម ជ្រុន ថេរ៉ាវ៉ាត់ បន្តថា ចំពោះការបញ្ឈប់ការបន្ទោបង់ពាសវាលពាសកាល (ODF) គិតត្រឹមឆ្នាំ ២០២២ គឺមានភូមិសម្រេចបានODF ចំនួន៥ ៣៤១ភូមិ ស្មើ៦០ភាគរយលើគោលដៅ ៨៨៥៩ ភូមិ ឃុំ/សង្កាត់ODF មានចំនួន៣៩២ ឃុំ/សង្កាត់ ស្មើ ៩៤ភាគរយលើគោលដៅ៤១៥ឃុំ/សង្កាត់ និងស្រុក/ក្រុង ODF ចំនួន៣១ស្រុក ស្មើ ១៥៥ភាគរយ លើគោលដៅ ២០ស្រុក/ក្រុង។
ឯកឧត្តម សង្កត់ធ្ងន់ថា លទ្ធផលជាវិជ្ជមាននេះ បានមកដោយសារការខិតខំប្រឹងប្រែងរបស់រាជរដ្ឋាភិបាល គួបផ្សំជាមួយនឹងការចូលរួមសហប្រតិបត្តិការយ៉ាងជិតស្និទ្ធជាមួយដៃគូអភិវឌ្ឍន៍ អង្គការមិនមែនរដ្ឋាភិបាលក្រៅប្រទេស និងអង្គការមិនមែនរដ្ឋាភិបាលក្នុងប្រទេសអ្នកពាក់ព័ន្ធរួមទាំងវិស័យឯកជនផងដែរ ។
គួរបញ្ជាក់ថា ក្រសួងអភិវឌ្ឍន៍ជនបទ បានកំណត់ទិសដៅរបស់ខ្លួនក្នុងការផ្តល់សេវាផ្គត់ផ្គង់ទឹកស្អាត និងអនាម័យឲ្យបាន១០០ភាគរយ នៅត្រឹមឆ្នាំ២០២៥ ។ ដោយឡែក ប្រទេសកម្ពុជា ក៏ជាប្រទេសដែលទទួលបានចំណាត់ថ្នាក់លេខ២ នៅក្នុងពិភពលោក ដែលបានកាត់បន្ថយចំនួនអត្រាភាគរយអ្នកបន្ទោបង់ពាសវាលពាសកាលពី ៨២,៧ភាគរយ នៅឆ្នាំ២០០០ មកត្រឹម ៤០,៦ភាគរយ នៅឆ្នាំ២០១៥ផងដែរ ៕
អត្ថបទថ្មីៗ
អត្ថបទពេញនិយម
