រយៈពេលពីរឆ្នាំ ក្រសួងបរិស្ថានផ្តល់រថយន្ត ម៉ូតូកង់បី និងឡដុតជាង ២០០គ្រឿងជូនដល់ក្រុងស្រុកដើម្បីពង្រឹងការគ្រប់គ្រងសំរាម
ភ្នំពេញ៖ ក្នុងឆ្នាំ២០២១ដល់ឆ្នាំ២០២២ ក្រសួងបរិស្ថាន បានផ្តល់រថយន្តដឹកសំរាមសំណល់រឹង ចំនួន ៥៨គ្រឿង ឡដុតសំរាម ៦០គ្រឿង ម៉ូតូកង់បី ១១៨គ្រឿង និងសម្ភារគាំទ្រជាច្រើន ជូនដល់រដ្ឋបាលក្រុង ស្រុក អង្គភាពនិងប្រតិបត្តិករមួយចំនួន ដើម្បីពង្រឹងការគ្រប់គ្រងសំរាម។
បើតាមក្រសួងបរិស្ថាន ថាមធ្យោបាយនិងសម្ភារទាំងអស់នេះ កំពុងប្រើប្រាស់ដើម្ចូបីលរួមសម្អាត ប្រមូលដឹកជញ្ជូន និងទុកដាក់សំរាម សំណល់រឹងនៅទូទាំងប្រទេស គោលបំណងរួមគ្នាគាំទ្រការរស់នៅស្អាត ភូមិឋានស្អាត ក៏ដូចជាការឆ្លើយតបនឹងគោលនយោបាយ ច្បាប់ បទដ្ឋានគតិយុត្តិ និងទស្សនវិស័យរបស់រាជរដ្ឋាភិបាល និងធ្វើឱ្យប្រសើរឡើងនូវការគ្រប់គ្រងសំរាម សំណល់រឹងទីប្រជុំជន ប្រកបដោយប្រសិទ្ធិភាព តម្លាភាព និងគណនេយ្យភាព ។
ក្រៅពីនេះ ក្រសួងបរិស្ថាន ក៏បានផ្តល់ការបណ្តុះបណ្តាល ដល់រដ្ឋបាលថ្នាក់ក្រោមជាតិ លើបច្ចេកទេស ក្នុងការគ្រប់គ្រងសំរាម សំណល់រឹង និងគម្រោងរៀបចំទីលានចាក់សំរាម តាមខ្នាតបច្ចេកទេស ។ រដ្ឋបាលក្រុង ស្រុកមួយចំនួន បាននិងកំពុងអនុវត្តគោលនយោបាយ ស្តីពីការគ្រប់គ្រងសំរាម សំណល់រឹងទីប្រជុំជន បានល្អប្រសើរ និងមួយចំនួនទៀត កំពុងឈានឆ្ពោះ ទៅរកការគ្រប់គ្រងសំរាម សំណល់រឹង ប្រកបដោយប្រសិទ្ធភាព ក្នុងពេលអនាគតខាងមុខ ដើម្បីឈានទៅធ្វើភាពជាម្ចាស់ នៃការគ្រប់គ្រងសំរាម សំណល់ទីប្រជុំជន ប្រកបដោយនិរន្តរភាព។
គួរបញ្ជាក់ថា រយៈពេល០២ឆ្នាំមកនេះ បន្ថែមពីលើការផ្តល់រថយន្ត ម៉ូតូកង់បី និងឡដុតជាង ២០០គ្រឿងដល់ក្រុងស្រុកនៅទូទាំងប្រទេស ដើម្បីពង្រឹងការគ្រប់គ្រងសំរាម ក្រសួងបរិស្ថាន ក៏បានផ្តល់ធុងសំរាមធំចំណុះ ០៥តោនទៅ ១១តោន ចំនួន ៦៨ធុងដល់ខេត្តចំនួន០៦ ធុងចម្រោះទឹកស្អាតចំនួន ៤០ធុង ផ្តល់ទៅរាជធានី-ខេត្ត ចំនួន១២ និងចំនួន ១៧១ធុងបំពាក់នៅតាមគ្រិះស្ថានសិក្សា ធុងដាក់សំរាម សំណល់រឹង (ញែកសំរាម) ចំនួន ៥០០ឈុត បានផ្តល់រួចជូនក្រុមការងារផ្តើមពីយើង ដាក់នៅតាមសួនច្បារសាធារណៈ បុរី ប៉េង ហួត និងសាលារៀន និងគ្រឿងចក្រចូកសំរាម «សាស័រ» ចំនួន ០២គ្រឿងបានផ្តល់ជូនទៅក្រុងព្រះសីហនុ ខេត្តព្រះសីហនុ។
ដោយឡែកកញ្ចប់សម្អាតសំរាមក្នុងក្របខណ្ឌគម្រោងជំរុញបរិយាកាសអំណោយផលដល់ការអភិវឌ្ឍដោយចីរភាព ដែលរួមមានមានធុងចម្រោះទឹកស្អាតចំនួន ៥០ធុង និងធុងសំរាមចំនួន ៣០០ធុងបានផ្តល់ជូនទៅរាជធានី-ខេត្តទាំង ២៥ផងដែរ៕
អត្ថបទថ្មីៗ
អត្ថបទពេញនិយម
