មន្ត្រីសុខាភិបាលស្នើឱ្យប្រជាពលរដ្ឋយកចិត្តទុកដាក់សុខភាព និងផឹកទឹកឱ្យបានត្រឹមត្រូវនៅរដូវក្តៅ
ភ្នំពេញ - ក្រសួងសុខាភិបាលស្នើឲ្យប្រជាពលរដ្ឋ ពិសេសកុមារតូចៗ និងមនុស្សចាស់ ផឹកទឹកឱ្យបានច្រើន ខណៈឆ្នាំនេះប្រទេសកម្ពុជាកើនកម្តៅ ដែលសីតុណ្ហភាពនឹងឡើងរហូតដល់ទៅ៤០-៤២ អង្សាសេ យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម ។
លោកជំទាវវេជ្ជបណ្ឌិត ឱ វណ្ណឌី រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល បានស្នើរឡើងដូចនេះ នៅក្នុងសន្និសីទសារព័ត៌មានស្ដីពី «ផលប៉ះពាល់បម្រែបម្រួលអាកាសធាតុនារដូវក្ដៅ និងការឆ្លើយតបទប់ស្កាត់ក្នុងកិច្ចថែរក្សាសុខមាលភាពសាធារណៈ» រៀបចំដោយអង្គភាពអ្នកនាំពាក្យរាជរដ្ឋាភិបាល ។ សន្និសីទនេះ ធ្វើឡើងនៅទីស្ដីការគណៈរដ្ឋមន្រ្ដី នាព្រឹកថ្ងៃទី២៧ ខែមីនា ឆ្នាំ២០១៩នេះ ។
ទន្ទឹមគ្នានេះ លោកជំទាវវេជ្ជបណ្ឌិតមានប្រសាសន៍ថា ដើម្បីជៀសផុតពីគ្រោះថ្នាក់ដល់សុខភាពនឹងអាចបណ្ដាលឲ្យបាត់បង់ជីវិត ដោយសារបញ្ហាជំងឺបេះដូង សួត និងអាចមានជំងឺឆ្លងផ្សេងៗ នៅក្នុងរដូវក្ដៅនេះ ប្រជាពលរដ្ឋគ្រប់រូបត្រូវយកចិត្តទុកលើបញ្ហាសុខភាព ។
លោកជំទាវវេជ្ជបណ្ឌិត ឱ វណ្ណឌីសម្រាប់អ្នកដួលសន្លប់បណ្តាលមកពីអាកាសធាតុក្តៅ ត្រូវដាក់អ្នកជំងឺឱ្យសម្រាក ដោយលើកជើងគាត់ឡើងលើបន្ដិច ឬកលជើងឱ្យខ្ពស់ ដើម្បីឲ្យចរន្ដឈាមហូរមកខួរក្បាល ត្រូវដាក់នៅក្រោមម្លប់ដែលត្រជាក់ ។ ស្របគ្នានេះ ត្រូវដោះ ឬបន្ធូរសម្លៀកបំពាក់អ្នកជំងឺចេញ និងដណ្ដប់អ្នកជំងឺដោយក្រណាត់សើមស្តើងដោយប្រើទឹកធម្មតា និងចៀសវាសប្រើភេសជ្ជៈផ្អែម ។
យោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម បានឱ្យដឹងថា ក្នុងក្របខ័ណ្ឌទូទាំងប្រទេស អាកាសធាតុអតិបរមាមធ្យមនឹងស្ថិតនៅក្នុងរង្វង់ ៣៦ ទៅ ៣៨ អង្សារសេ ។ ប៉ុន្តែនៅក្នុងខែមេសា និងឧសភា ឆ្នាំ២០១៩ នេះ អាកាសធាតុនឹងក្តៅហួតហែងខ្លាំង ហើយពេលខ្លះសីតុណ្ហភាពនឹងកើនឡើងដល់ចន្លោះពី៤០ ទៅ៤២ អង្សារសេ ពិសេសនៅតំបន់ទំនាបកណ្តាលភាគពាយ័ព្យ និងតំបន់ខ្ពង់រាបភាគខាងជើង ។
តាមអ្នកឯកទេសខាងសុខភាព បានឱ្យដឹងថាមនុស្សស្រីពេញវ័យគួរតែទទួលទានទឹក ២.៧ លីត្រក្នុងមួយថ្ងៃ និងមនុស្សប្រុសពេញវ័យគួរទទួលទានទឹក ៣.៧ លីត្រក្នុងមួយថ្ងៃ ។ ករណីខ្លះដែលអ្នកគួរទទួលទានទឹកបន្ថែម ប្រសិនបើអ្នករស់នៅតំបន់ក្តៅ ឬក៏ប្រើប្រាស់កម្លាំងពលកម្មច្រើន ៕
រដ្ឋលេខាធិការក្រសួងសុខាភិបាល ៖ “អាកាសធាតុក្ដៅខ្លាំង អាចនឹងបណ្ដាលឲ្យយើងស្លាប់បានដោយសារតែយើងខ្សោះជាតិទឹក បាត់នូវសាធាតុរ៉ែផ្សេងៗ ធ្វើឱ្យយើងដួលសន្លប់ ! ...កុំទុកគាត់យូរ ត្រូវប្រញាប់នាំមកមន្ទីរពេទ្យ ឬមណ្ឌលសុខភាពដែលនៅជិតគាត់...”។
អត្ថបទថ្មីៗ
អត្ថបទពេញនិយម
