អគ្គនាយកដ្ឋានគយចេញវិធានការបណ្ដោះអាសន្នលើការនាំចូលមីកញ្ចប់ និងការ៉េម ៣ម៉ាក សង្ស័យផ្ទុកសារធាតុប៉ះពាល់សុខភាព
ភ្នំពេញ - អគ្គនាយកដ្ឋានគយ និងរដ្ឋាករកម្ពុជា បានដាក់ចេញនូវវិធានការបណ្ដោះអាសន្នលើការនាំចូលមីកញ្ចប់ និងការ៉េម ចំនួន៣ម៉ាកដែលផលិតនៅប្រទេសថៃ វៀតណាម និងបារាំង ក្រោយសង្ស័យថាមានផ្ទុកសារធាតុអេទីឡែនអុកស៊ីត (Ethylene Oxide) ដែលអាចបង្កហានិភ័យផ្នែកសុខភាពដល់ អ្នកប្រើប្រាស់។
ក្នុងលិខិតជម្រាបជូនដំណឹងទៅកាន់លោក លោកស្រី ប្រធាននាយកដ្ឋាន សាខា និងការិយាល័យគយ និងរដ្ឋាករពាក់ព័ន្ធ កាលពីថ្ងៃទី២៩ ខែ កក្កដា ឆ្នាំ២០២២ អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា អាជ្ញាធរសុវត្ថិភាពម្ហូបអាហាររបស់ប្រទេសនៅសហគមន៍អឺរ៉ុបមួយចំនួន បានរកឃើញលើផលិតផលមីកញ្ចប់ និងការ៉េមមួយចំនួន មានផ្ទុកសំណល់សារធាតុអេទីឡែនអុកស៊ីត (Ethylene Oxide) ដែលសហ ភាពអឺរ៉ុប អាមេរិក និងអង្គការសុខភាពពិភពលោកចាត់ទុកថា ជាសារធាតុបង្កហានិភ័យជាជំងឺមហារីកចំពោះអ្នកប្រើប្រាស់។
ជាមួយគ្នានេះ ដើម្បីចូលរួមការពារសុខភាពសាធារណៈសុវត្ថិភាពម្ហូបអាហារ និងការពារសុខុមាលភាពអ្នកប្រើប្រាស់ អគ្គនាយកដ្ឋានគយ បានណែនាំបណ្តោះអាសន្ន ដោយតម្រូវចាប់ពីថ្ងៃទី១ ខែសីហា ឆ្នាំ២០២២ តទៅ រាល់ការនាំចូលទំនិញជាមីកញ្ចប់ម៉ាក «Lucky Me!» ផលិតនៅប្រទេសថៃ, មីកញ្ចប់ម៉ាក «Háo Háo» ផលិតនៅប្រទេសវៀតណាម និងការ៉េមម៉ាក «Häagen-Dazs» (Vanilla) ផលិតនៅប្រទេសបារាំង ដូចមានបរិយាយលម្អិតក្នុងបញ្ជីភ្ជាប់មកជាមួយលិខិតនេះ ត្រូវមានអមមកជាមួយនូវវិញ្ញាបនបត្របញ្ជាក់ការវិភាគសារធាតុ Ethylene Oxide ពីស្ថាប័នមានសមត្ថកិច្ចត្រួតពិនិត្យសុវត្ថិភាពម្ហូបអាហារនៃប្រទេសនាំចេញ។
ដោយឡែក ចំពោះទំនិញដែលមកដល់ដែនគយមុនថ្ងៃទី១ ខែសីហា ឆ្នាំ២០២២ អ្នកនាំចូលត្រូវដកសំណាកទំនិញធ្វើការវិភាគសារធាតុ Ethylene Oxide នៅ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម មុនពេលអនុញ្ញាតឱ្យបញ្ចេញទំនិញពីគយ។
អគ្គនាយកដ្ឋានគយ និងរដ្ឋាករកម្ពុជា ក៏ណែនាំឲ្យនាយកដ្ឋានសវនកម្មគយត្រូវធ្វើកាតាមដាននិងវាយតម្លៃហានិភ័យលើផលិតផលទាំងនេះជាប្រចាំដើម្បីលើកវិធានការអនុវត្តឱ្យបានទាន់ពេលនិងមានប្រសិទ្ធភាព។ រីឯមន្រ្តីគយ និងរដ្ឋាករមានសមត្ថកិច្ច ត្រូវយកចិត្តទុកដាក់ផ្ទៀងផ្ទាត់ព័ត៌មាន និងទិន្នន័យដែលប្រកាសក្នុងឯកសារជាមួយនឹងទំនិញជាក់ស្ដែងដើម្បីជៀសវាងការបន្លំនាំចូលដោយគេចវេសពីវិធានការខាងលើជាយថាហេតុ។
អត្ថបទថ្មីៗ
អត្ថបទពេញនិយម
