មន្ត្រីជាន់ខ្ពស់សុខាភិបាលលើកទឹកចិត្តដល់ស្ត្រីមានផ្ទៃពោះត្រូវទៅពិនិត្យសុខភាពឱ្យបានទៀងទាត់
ភ្នំពេញ - នៅក្នុងទិវាជាតិសុខភាពមាតា ទារក និងកុមារ ឆ្នាំ២០២២ រៀបចំឡើងក្រោមប្រធានបទ “ពង្រឹងការផ្តល់សេវាសុខភាពបន្តពូជ សុខភាពមាតា ទារក និងកុមារ និងការផ្តល់វ៉ាក់សាំងបង្ការជំងឺកូវីដ-១៩ ជូនស្រ្តីមានផ្ទៃពោះ និងមាតាកំពុងបំបៅកូនដោយទឹកដោះម្តាយ” នៅថ្ងៃចន្ទនេះ មន្រ្តីជាន់ខ្ពស់ក្រសួងសុខាភិបាលបានចាត់ទុកសកម្មភាពថែទាំសុខភាពស្ត្រីពេលមានផ្ទៃពោះ ជាផ្នែកសំខាន់បំផុតដែលត្រូវយកចិត្តទុកដាក់ ស្របនឹងការរស់នៅតាមគន្លងប្រក្រតីភាពថ្មីក្នុងបរិបទនៃជំងឺកូវីដ-១៩ ។
លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល មានប្រសាសន៍នៅក្នុងទិវាជាតិសុខភាពមាតា ទារក និងកុមារ ឆ្នាំ២០២២ រៀបចំដោយមជ្ឈមណ្ឌលជាតិគាំពារមាតា និងទារក ។
លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល មានប្រសាសន៍ថា ក្នុងបរិបទនៃជំងឺតូវីដ-១៩ ស្រ្តីមានផ្ទៃពោះនិងមាតាគ្រប់រូបត្រូវទៅពិនិត្យសុខភាព និងពិគ្រោះយោបល់ជាមួយគ្រូពេទ្យ ឬឆ្មបជំនាញនៅមណ្ឌលសុខភាពឱ្យបានទៀងទាត់ចំនួន ៤ដង តាមពេលវេលា និងការណែនាំរបស់គ្រូពេទ្យ ។ ទន្ទឹមគ្នានេះ ស្ត្រីជាម្តាយនឹងបានទទួលថ្នាំបង្ការជំងឺផ្សេងៗដែលអាចជួយដល់សុខភាពម្តាយ និងទារក ។
“សូមស្ត្រីជាម្តាយទីពិនិត្យសុខភាពឱ្យបានទៀងទាត់ ទទួលបានថ្នាំបង្ការជំងឺតេតាណូស និងថ្នាំបង្ការជំងឺកូវីដ-១៩ ទទួលយកសេវា បង្ការព្យាបាលទាំងអស់ ពិសេសការស្ម័គ្រចិត្តធ្វើតេស្តឈាមរកមេរោគអេដស៍ ស្វាយ រលាកថ្លើម ប្រភេទបេ ដើម្បីរួមគ្នាលុបបំបាត់ការចម្លងមេរោគពីម្តាយទៅកូន”។ លោកជំទាវវេជ្ជបណ្ឌិត ប្រាក់ សោភ័ណនារី ។
លោកជំទាវវេជ្ជបណ្ឌិត បានបន្តថា សូមស្ត្រីជាម្តាយទៅសម្រាលកូននៅមណ្ឌលសុខភាព ឬមន្ទីរពេទ្យដែលមានគ្រូពេទ្យ ឬឆ្មបជំនាញ និងទៅពិនិត្យសុខភាពក្រោយពេលសម្រាលទាំងមាតា ទាំងទារក យកកូនទៅទទួលវ៉ាក់សាំងបង្ការជំងឺទាំង ១១មុខ តាមពេលវេលាកំណត់ ពិនិត្យតាមដានសុខភាពនិងការលូតលាស់របស់កូន រហូតដល់កូនមានអាយុពីរឆ្នាំ ។
នៅក្នុងដំណាក់កាលការលូតលាស់របស់កុមារតាំងពីវ័យដំបូង ម្តាយត្រូវបំបៅកូនដោយទឹកដោះម្តាយតែមួយមុខគត់ ចាប់ពីពេលទារកកើតភ្លាមរហូតដល់ទារកមានអាយុ ៦ខែ និងផ្តល់អាហារបន្ថែមគ្រប់មុខ គ្រប់ជីវជាតិ (បបរខាប់គ្រប់គ្រឿង) រួមជាមួយការបន្តបំបៅ ទឹកដោះម្តាយរហូតដល់កុមារមានអាយុយ៉ាងតិច២ឆ្នាំ។ ម្តាយត្រូវប្រញាប់យកទារកទៅមន្ទីរពេទ្យភ្លាមនៅពេលឃើញសញ្ញាគ្រោះថ្នាក់ណាមួយនៃជំងឺរលាកផ្លូវដង្ហើម ជំងឺរាគ ឬជំងឺផ្សេងទៀត និងយកទារក ឬកុមារតូចដែលមានរាងកាយស្គម ឬមិនឡើងទម្ងន់សោះ ដើម្បីទទួលការព្យាបាលនៅមន្ទីរពេទ្យ ។
សូមជម្រាបថា ទិវាជាតិសុខភាពមាតា និងទារក តែងរៀបចំឡើងជារៀងរាល់ឆ្នាំ បំណងពង្រឹងការផ្តល់សេវាសុខភាពមាតា ទារក និងកុមារ ពិសេសលើកទឹកចិត្តឱ្យស្ត្រីបំបៅកូនដោយទឹកដោះម្តាយ ព្រមទាំងផ្សព្វផ្សយចំណេះដឹងសុខភាពទៅកាន់សាធារណជន ៕
អត្ថបទថ្មីៗ
អត្ថបទពេញនិយម
