ប្រជាពលរដ្ឋនៅភ្នំពេញនឹងមានទឹកស្អាតប្រើប្រាស់គ្រប់គ្រាន់ចាប់ពីចុងឆ្នាំ២០២២
ភ្នំពេញ - អ្នករស់នៅរាជធានីភ្នំពេញនឹងមានទឹកស្អាតប្រើប្រាស់គ្រប់គ្រាន់ ស្របនឹងសមត្ថភាពផ្គត់ផ្គង់ទឹកស្អាតសរុបប្រមាណ ១លានម៉ែត្រគូប ចាប់ពីចុងឆ្នាំ២០២២ ហើយធានាការប្រើប្រាស់ពេញលេញរហូតដល់ឆ្នាំ២០៣០ ។ នៅក្នុងសន្និសីទកាសែតរៀបចំឡើងដោយអង្គភាពអ្នកនាំពាក្យរដ្ឋាភិបាល កាលពីព្រឹកថ្ងៃព្រហស្បតិ៍ ទី២៣ ខែមេសាកន្លងទៅ ។
លោក សម សិទ្ធិ ប្រធាននាយកដ្ឋានបញ្ញត្តិកម្មទឹកស្អាត ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍ បានថ្លែងថា បច្ចុប្បន្នសមត្ថភាពផលិតទឹកស្អាតនៅទីក្រុងភ្នំពេញមានត្រឹម៦០ម៉ឺនម៉ែត្រគូបប៉ុណ្ណោះ ខណៈតម្រូវការមានរហូតដល់ទៅ៧០ម៉ឺនម៉ែត្រគូប ។
លោក សម សិទ្ធិ ពន្យល់ថា ទឹកស្អាតមិនទាន់ប្រើប្រាស់គ្រប់គ្រាន់តាមតំរូវការនៅពេលនេះ បណ្តាលមកពីតំបន់រដ្ឋបាលមួយចំនួនរបស់ខេត្តកណ្តាលត្រូវបានកាត់ចូលរាជធានីភ្នំពេញ ។ លោកបន្តថា ជាដំណោះស្រាយរដ្ឋករទឹកកម្ពុជា កំពុងសាងសង់អាងប្រព្រឹត្តកម្មទឹកស្អាត៣កន្លែងផ្សេងទៀត ដែលមានសមត្ថភាពផលិតទឹកស្អាតជាង៤០ម៉ឺនម៉ែត្រគូប មានទីតាំងនៅបាក់ខែង និងនៅតាខ្មៅ (២០ម៉ឺនម៉ែត្រគូប) ។
សូមបញ្ជាក់ថា រោងចក្រផលិតទឹកស្អាតបាក់ខែង តម្លៃជាង១៥០លានដុល្លារ នឹងចាប់ផ្ដើមសាងសងនៅខែឧសភា ឆ្នាំ២០២០ ខាងមុខ មានសមត្ថភាពផលិតបានទឹកស្អាត ១៩៥ពាន់ម៉ែត្រគូបក្នុង១ថ្ងៃ។
តាមការព្យាករណ៍ បានបង្ហាញថា តំរូវការទឹកស្អាត នៅរាជធានីភ្នំពេញនឹងមានរហូតដល់ជាង៩០០ពាន់ម៉ែត្រគូបក្នុង១ថ្ងៃ នៅឆ្នាំ២០២៥ និងជាង១លានម៉ែត្រគូបក្នុង១ថ្ងៃ នៅឆ្នាំ២០៣០ សម្រាប់បម្រើតម្រូវការទឹកស្អាតជូនប្រជាពលរដ្ឋប្រមាណ ៥៤០ពាន់គ្រួសារ ៕
អត្ថបទថ្មីៗ
អត្ថបទពេញនិយម
