បាត់ដំបង - នាព្រឹកថ្ងៃព្រហស្បតិ៍នេះ រដ្ឋបាលខេត្តបាត់ដំបងបានរៀបចំកម្មវិធីអប់រំផ្សព្វផ្សាយ​អំពីភាពចាំបាច់នៃការប្រើប្រាសប្រព័ន្ធលូ និងការគ្រប់គ្រងប្រព័ន្ធចម្រោះទឹកកខ្វក់នៅក្នុងក្រុងបាត់ដំបង​ទៅកាន់សាធារណជន ។ ការប្រារព្ធកម្មវិធីនេះ មានគោលបំណងបង្ហាញពីការយកចិត្តទុកដាក់ទៅលើភាពចាំបាច់នៃការប្រើប្រាស់ប្រព័ន្ធលូ និងប្រព័ន្ធចម្រោះទឹកកខ្វក់ ។ 

ឯកឧត្តម វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៍ថា ក្រសួងសាធារណការមានបំណងផ្សព្វផ្សាយអំពីគុណប្រយោជន៍ និងភាពចាំបាច់នៃការថែទាំគុណភាពហេដ្ឋាចនាសម្ព័ន្ធសាធារណៈ ដើម្បីចូលរួមរក្សាគុណភាពហេដ្ឋាចនាសម្ព័ន្ធ​ប្រកបដោយនិរន្តភាពសម្រាប់អ្នកជំនាន់ក្រោយ ។ 

ឯកឧត្តម វង្ស ពិសិដ្ឋ បានបញ្ជាក់បន្ថែមថា ៖ “ទឹកកខ្វក់ដែលចេញពីលំនៅឋាន និងអាជីវកម្មផ្សេងៗជាច្រើនកំពុងបញ្ចេញចោលទៅក្នុងស្ទឹង បឹង ប្រឡាយ ឬជ្រាបទៅក្នុងដីដោយគ្មានការសម្អាតជាមុន ។ សំណល់ទឹកកង្វក់ទាំងនោះ​អាច​បណ្ដាលឱ្យប៉ះពាល់ដល់បរិស្ថាន និងសុខភាពសាធារណៈយ៉ាងធ្ងន់ធ្ងរ ប្រសិនបើមិនមានការចូលរួមបញ្ជ្រាបការយល់ដឹងដល់ប្រជាពលរដ្ឋបានទូលំទូលាយ”។ 

ចំណែកឯកឧត្តម សឿម ប៉ុនរិទ្ធ អភិបាលរងខេត្តបាត់ដំបង មានប្រសាសន៍ថា តាមរយៈក្រសួងជំនាញ និងដៃគូអភិវឌ្ឍន៍ ក្រុងបាត់ដំបងបានសាងសង់ប្រព័ន្ធលូ ស្ថានីយ៍បូមទឹកកខ្វក់ និងស្ថានីយ៍ប្រព្រឹត្តកម្មទឹកកខ្វក់ថ្មី ដើម្បីគ្រប់គ្រងប្រព័ន្ធបង្ហូរនានា ។ ទន្ទឹមគ្នានេះឯកឧត្តមបានអំពាវនាវដល់ប្រជាពលរដ្ឋ ត្រូវរៀបចំនិងតភ្ជាប់ប្រព័ន្ធលូនៅក្នុងក្រុងទៅតាមលក្ខណៈបច្ចេកទេសឱ្យបានត្រឹមត្រូវ ។

“ដើម្បីចូលរួមចំណែកដោះស្រាយបញ្ហាទឹកកខ្វក់ កត្តាសំខាន់គឺប្រជាពលរដ្ឋគ្រប់ស្រទាប់វណ្ណៈ ត្រូវយល់ដឹងអំពីការវេចខ្ចប់សំរាមនិងកាកសំណល់រាវ និងរឹងឱ្យបានត្រឹមត្រូវ ដើម្បីភ្នាក់ងារប្រមូលយកទៅចោលនៅទីតាំងដែលមានសុវត្ថិភាព”។ នេះបើតាមប្រសាសន៍របស់ឯកឧត្តម សឿម ប៉ុនរិទ្ធ អភិបាលរងខេត្តបាត់ដំបង ។

សូមជម្រាបថានៅក្នុងពិធីផ្សព្វផ្សាយខាងលើក៏មានការអញ្ជើញចូលរួមពីសំណាក់តំណាងកម្មវិធីនៃអង្គការសហប្រជាជាតិសម្រាប់លំនៅឋានមនុស្សជាតិ (UN-Habitat) ប្រធាន និងអនុប្រធានមន្ទីរនានាក្នុងខេត្ត អភិបាលក្រុង មន្ត្រីពាក់ព័ន្ធ យុវជន សិស្សានុសិស្ស និងប្រជាពលរដ្ឋជាច្រើននាក់ នៅក្នុងក្រុង​បាត់ដំបង ។ ខេត្តបាត់ដំបង ជាតំបន់សេដ្ឋកិច្ច ពាណិជ្ជកម្ម កសិកម្ម វប្បធម៌ និងទេសចរណ៍ដ៏សំខាន់នៅព្រះរាជាណាចក្រកម្ពុជា ៕