កម្ពុជា-អូស្ត្រាលីអនុវត្តគម្រោង CAP-RED ថវិកាចំនួន ៨៧លានដុល្លារអូស្ត្រាលី

ថ្ងៃអាទិត្យ ទី១៨ ខែកញ្ញា​ ឆ្នាំ២០២២      ម៉ៅ សំណាង
ចែករំលែក
Views: 299
1

ភ្នំពេញ - បើតាមព័ត៌មានពីស្ថានទូតអូស្ត្រាលីប្រចាំកម្ពុជា បានឱ្យដឹងថា ឯកអគ្គរាជទូត Kang បានជួបជាមួយឧបនាយករដ្ឋមន្ត្រី ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដោយពិភាក្សាចុងក្រោយលើការបង្កើតកម្មវិធីថ្មីរបស់អូស្ត្រាលី ដែលមានថវិកាចំនួន ៨៧លានដុល្លារអូស្ត្រាលី សម្រាប់កម្មវិធីភាពជាដៃគូកម្ពុជា-អូស្ត្រាលី ដើម្បីអភិវឌ្ឍន៍សេដ្ឋកិច្ចធន់ ហៅកាត់ថា CAP-RED ។ 

 

 

កម្មវិធីកម្មវិធីភាពជាដៃគូកម្ពុជា-អូស្ត្រាលី ដើម្បីអភិវឌ្ឍន៍សេដ្ឋកិច្ចធន់ ហៅកាត់ថា CAP-RED នឹងជួយដល់ការផ្លាស់ប្តូរទៅរកកសិកម្មដែលមានតម្លៃខ្ពស់ និងការកែច្នៃកសិផល ជំរុញការអភិវឌ្ឍវិស័យទឹក ថាមពល និងភស្តុភារ និងជួយធុរកិច្ចកម្ពុជា ដើម្បីទទួលបានឱកាសទីផ្សារថ្មីៗ។

 

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណចំពោះស្ថានទូតអូស្ត្រាលីប្រចាំកម្ពុជា និងចាត់ទុកកម្មវិធី CAP-RED ជាការរួមចំណែកយ៉ាងសំខាន់ក្នុងរបៀបវារៈនៃការអភិវឌ្ឍសេដ្ឋកិច្ចរបស់កម្ពុជា ពោលគឺជួយដល់ការស្ថារឡើងវិញ ភាពធន់ និងកំណែទម្រង់។

 

ឯកអគ្គរាជទូត Kang មានប្រសាសន៍ថា កម្មវិធី CAP-RED ឆ្លុះបញ្ចាំងពីការប្តេជ្ញាចិត្តរបស់អូស្ត្រាលីចំពោះកិច្ចខិតខំប្រឹងប្រែងស្តារឡើងវិញរបស់កម្ពុជា និងការគាំទ្រកាន់តែស៊ីជម្រៅរបស់អូស្ត្រាលីក្នុងពេលប្រារព្ធខួបលើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។

 

សូមជម្រាបថា ចាប់តាំងពីឆ្នាំ២០១០ អូស្ត្រាលីបានវិនិយោគទឹកប្រាក់ចំនួន ១៣០ លានដុល្លារអូស្រ្តាលី តាមរយៈកម្មវិធីខ្សែសង្វាក់តម្លៃកសិកម្មកម្ពុជា-អូស្ត្រាលី (CAVAC) ដើម្បីបង្កើនការផលិតស្រូវ ប្រព័ន្ធធារាសាស្រ្តសម្រាប់កសិករខ្នាតតូច និងការធ្វើពិពិធកម្មកសិកម្មនៅកម្ពុជា។ កម្មវិធីនេះបានកាត់បន្ថយភាពក្រីក្រនៅតាមជនបទ បង្កើនប្រាក់ចំណូលសម្រាប់កសិករបានច្រើន និងបានជួយដល់វិស័យកសិកម្មនៅកម្ពុជា ឱ្យកាន់តែមានសក្តានុពលខាងផ្នែកពាណិជ្ជកម្ម និងការប្រកួតប្រជែង។

 

កម្មវិធី CAVAC របស់អូស្ត្រាលីបានបិទបញ្ចប់ជាផ្លូវការនៅថ្ងៃទី១៥ ខែសីហា ឆ្នាំ២០២២ កន្លងទៅ ប៉ុន្តែវត្តមានកម្មវិធីភាពជាដៃគូកម្ពុជា-អូស្ត្រាលី ដើម្បីអភិវឌ្ឍន៍សេដ្ឋកិច្ចធន់ ហៅកាត់ថា CAP-RED បានបង្កើតឡើងបន្តទៀត ដើម្បីបង្ហាញការប្តេជ្ញាចិត្តរបស់រដ្ឋាភិបាលអូស្ត្រាលី គាំទ្រដល់ការអភិវឌ្ឍវិស័យកសិកម្មនៅកម្ពុជាឆ្ពោះទៅមុខ៕ 

 

 

អត្ថបទពេញនិយម

រដ្ឋមន្ត្រីអភិវឌ្ឍន៍ជនបទលើកទឹកចិត្តឱ្យគ្រប់គ្នាគិតពីបរិក្ខាទឹកស្អាតនិងអនាម័យធន់នឹងការប្រែប្រួលអាកាសធាតុ

អង្គការ​​សំអា​តទន្លេសមុទ្រ តាំង​បង្ហាញស្នាដៃ​សិល្បៈដែល​កែច្នៃ​ពីសំ​រាម​ក្នុង​ទន្លេ

រដ្ឋម​ន្ត្រី​ប​រិស្ថា​ន​៖ កម្ពុជា​អាច​លក់​កាបូន​បាន ជារ​បត់ថ្មីមួយ​ដែល​អាចរ​កចំណូល​ពីការ​អភិរក្សធន​ធាន​ធម្មជាតិ

ក្រសួង​អភិវឌ្ឍន៍​ជនបទ រៀបចំការ​ប្រកួតប្រជែង​អត្ថបទ​លើប្រធានបទ ទឹកស្អាត អនាម័យ និងវិធី​បង្ការរោគ សម្រាប់​សិស្សថ្នាក់ទី​១២

សម្តេច​តេជោ ហ៊ុន សែន ស្នើឲ្យរដ្ឋមន្រ្តី​ការប​រទេស​អាស៊ាន បង្កើត​​កិច្ចព្រមព្រៀង​បៃតង​អា​ស៊ាន