សន្និសីទ COP27 បញ្ចប់ដោយបរិយាកាសខ្វែងគំនិតគ្នាលើកិច្ចព្រមព្រៀងដំណោះស្រាយអាកាសធាតុ

ថ្ងៃសៅរ៍ ទី១៩ ខែវិច្ឆិកា​ ឆ្នាំ២០២២      ម៉ៅ សំណាង
ចែករំលែក
Views: 287
1

អេហ្ស៊ីប - សន្និសីទ​អាកាសធាតុ COP27 នៅទីក្រុង Sharm el-Sheikh សាធារណរដ្ឋអារ៉ាប់អេហ្ស៊ីប បានបិទបញ្ចប់នៅថ្ងៃទី១៨ ខែវិច្ឆិកាកន្លងទៅ ។ សន្និសីទបណ្តាភាគីអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុរយៈពេលជិតពីរសប្តាហ៍នេះ ផ្តោតសំខាន់​ទៅលើ​កិច្ចពិភាក្សានិងការចរចាគ្នា​ក្នុងសំណុំរឿងពីរប្រសងគ្នា ។ ជាលទ្ធផលប្រទេសសេដ្ឋកិច្ចជឿនលឿនជាច្រើនបានប្តេជ្ញាចូលរួមសកម្មភាពទប់ស្កាត់ការប្រែប្រួលអាកាសធាតុសកល ខណៈប្រទេសមួយចំនួនទៀតនៅតែខ្វែងគំនិតគ្នាលើកិច្ចព្រមព្រៀងដំណោះស្រាយអាកាសធាតុមួយនេះ ។

 

 

ប្រធានបទរឿងទាំងពីរ រួមមាន ទី១ អង្គការសហប្រជាជាតិជំរុញឱ្យប្រទេសទាំងអស់ក្នុងពិភពលោក បង្កើនកិច្ចខិតខំប្រឹងប្រែង​បន្តទៀត ដើម្បីកាត់បន្ថយការបញ្ចេញឧស្ម័នផ្ទះកញ្ចក់ទៅកាន់បរិយាកាស មិនឱ្យកើនកម្តៅលើសពី ១,៥អង្សារដូចមាន​ចែង​នៅក្នុង​កិច្ចព្រមព្រៀង​ក្រុង​ប៉ារីសស្តីពីអាកាសធាតុ ឆ្នាំ២០១៥ ។ ទី២ ក្រុមប្រទេសកំពុងអភិវឌ្ឍន៍ជំរុញឱ្យប្រទេសអ្នកមានបង្កើត​មូលនិធិអាកាសធាតុសម្រាប់​ជួយ​ប្រទេស​ក្រីក្រ និងប្រទេសកំពុងអភិវឌ្ឍន៍ ។ ក្រុមប្រទេសកំពុងអភិវឌ្ឍន៍នឹងយកថវិកានៃមូលនិធិនេះ ដើម្បីបង្កើតសកម្មភាពនានាតបទៅនឹងភាពធន់នឹងអាកាសធាតុ ។ 

 

តាមរយៈការប៉ានប្រមាណដំបូងរបស់អ្នកជំនាញអាកាសធាតុនៃអង្គការសហប្រជាជាតិ ក្រុមប្រទេស​ក្រីក្រ និងប្រទេសកំពុងអភិវឌ្ឍន៍ ត្រូវការកញ្ចប់ថវិកាប្រមាណ ១០០ពាន់លានដុល្លារសហរដ្ឋអាម៉េរិកសម្រាប់ប្រើប្រាស់មុនឆ្នាំ២០២៥ ។ ទោះបីយ៉ាងណាសំណុំរឿងពីរដាច់ផ្សេងគ្នា ស្តាប់ទៅជារឿងតែមួយ​ ពោលគឺចង់ឱ្យប្រទេសភាគីអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុរបស់អង្គការសហប្រជាជាតិទាំងអស់ រួមដៃគ្នាគិតគូរដល់ការជួយសង្គ្រោះភពផែនដីតបនឹងវិបត្តិប្រែប្រួលអាកាសធាតុ ។ 

 

ព័ត៌មានរបស់អង្គការសហប្រជាជាតិ បានឱ្យដឹងថា មានប្រទេសចំនួនប្រាំប៉ុណ្ណោះដែលបានបង្ហាញការប្តេជ្ញាចិត្តគាំទ្រថវិកាដល់មូលនិធិអាកាសធាតុខាងលើ មានដូចជា ប្រទេសអូទ្រីស ស្កុតឡេន ប៊ែលហ្សិក ដាណឺម៉ាក និងអាឡឺម៉ង់ ។ ចំណែកបណ្តាប្រទេសសេដ្ឋកិច្ចធំមួយចំនួនទៀត ពុំទាន់សម្រេចចិត្តយ៉ាងណានោះឡើយ ដោយត្រូវរង់ចាំមើលជាបន្តបន្ទាប់ទៀត ។ 

 

ជាក់ស្តែងសហរដ្ឋអាម៉េរិកបានប្តេជ្ញាចិត្តដោះស្រាយវិបត្តិអាកាសធាតុដោយបង្កើតកញ្ចប់ថវិការបស់ខ្លួនអភិវឌ្ឍន៍សេដ្ឋកិច្ចបៃតង ចំណែកប្រទេសចិនចាត់ទុកខ្លួនឯងជាប្រទេសកំពុងអភិវឌ្ឍន៍ ហើយបន្តសកម្មភាពជំរុញឱ្យប្រទេសអភិវឌ្ឍផ្តល់ថវិកាដល់ក្រុមប្រទេសកំពុងអភិវឌ្ឍន៍ ព្រមទាំងបង្ហាញពីសកម្មភាពផ្ទាល់ខ្លួនជាច្រើនអនុវត្តឆ្លើយតបទៅនឹងការប្រែប្រួលអាកាសធាតុសកល ។ 

 

ជារួមមកវិញ តាមរយៈកិច្ចពិភាក្សាពីគ្រប់ភាគីពាក់ព័ន្ធរបស់អនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតុលើកទី២៧ (COP27) បានបង្ហាញសញ្ញារួមមួយប្រាប់ទៅកាន់ប្រទេសទាំងអស់នៅក្នុងពិភពលោកថា ដល់ពេលហើយដែលត្រូវនាំគ្នាគិតនិងដោះស្រាយវិបត្តិអាកាសធាតុ និងមិនត្រូវបញ្ចេញឧស្ម័នផ្ទះកញ្ចក់ធ្វើឱ្យកើនកំដៅដល់ភពផែនលើសពី ១,៥អង្សារឡើយ ៕

 

អត្ថបទពេញនិយម

រដ្ឋមន្ត្រីអភិវឌ្ឍន៍ជនបទលើកទឹកចិត្តឱ្យគ្រប់គ្នាគិតពីបរិក្ខាទឹកស្អាតនិងអនាម័យធន់នឹងការប្រែប្រួលអាកាសធាតុ

អង្គការ​​សំអា​តទន្លេសមុទ្រ តាំង​បង្ហាញស្នាដៃ​សិល្បៈដែល​កែច្នៃ​ពីសំ​រាម​ក្នុង​ទន្លេ

រដ្ឋម​ន្ត្រី​ប​រិស្ថា​ន​៖ កម្ពុជា​អាច​លក់​កាបូន​បាន ជារ​បត់ថ្មីមួយ​ដែល​អាចរ​កចំណូល​ពីការ​អភិរក្សធន​ធាន​ធម្មជាតិ

ក្រសួង​អភិវឌ្ឍន៍​ជនបទ រៀបចំការ​ប្រកួតប្រជែង​អត្ថបទ​លើប្រធានបទ ទឹកស្អាត អនាម័យ និងវិធី​បង្ការរោគ សម្រាប់​សិស្សថ្នាក់ទី​១២

សម្តេច​តេជោ ហ៊ុន សែន ស្នើឲ្យរដ្ឋមន្រ្តី​ការប​រទេស​អាស៊ាន បង្កើត​​កិច្ចព្រមព្រៀង​បៃតង​អា​ស៊ាន