មណ្ឌលគិរី - ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយសកាកបាទក្រហមកម្ពុជា តាមរយៈកាកបាទក្រហមកម្ពុជា បានសព្វព្រះទ័យប្រោសព្រះរាជទានសមិទ្ធផលថ្មីមួយចំនួន មានអណ្ដូងទឹកស្អាតចំនួន០៣ ស្ថានីយលាងដៃចំនួន០៧ និងបង្គន់អនាម័យមួយខ្នងមាន ០៤បន្ទប់ ដល់​វិទ្យាល័យចំនួន ០១ និងសាលា​បឋមសិក្សាចំនួន ០៦ នៅស្រុកកោះញែក និងស្រុកកែវសីមា ខេត្តមណ្ឌលគិរី ធ្វើឡើង​នៅវិទ្យាល័យ ហ៊ុនសែន កោះញែក កាលពីព្រឹកថ្ងៃសុក្រកន្លងទៅ ។

លោកជំទាវ មែន នារីសោភ័គ អគ្គលេខាធិការងទី១ កាកបាទក្រហមកម្ពុជាបានលើកឡើងថា ហ្លួងម៉ែជាអម្ចាស់ជីវិតតម្កល់លើត្បូង បានសព្វព្រះរាជហឫទ័យប្រោសប្រទានព្រះរាជ​ទ្រព្យផ្ទាល់ព្រះអង្គចំនួន ២ម៉ឺនដុល្លារអាម៉េរិកជូនសម្ដេចកិត្តិព្រឹទ្ធបណ្ឌិត ហើយដោយ​មើល​ឃើញ​​ពីការ​លំបាក និងការខ្វះខាតទឹកសម្រាប់ប្រើប្រាស់ក្នុងសាលា និងតាម​សហ​គ​ម​ន៍នៅឆ្ងាយដាច់ស្រយាល ទើបសម្ដេចកិត្តិព្រឹទ្ធបណ្ឌិតបានសម្រេចយកព្រះរាជទ្រព្យទាំងនោះមកជីកអណ្ដូងទឹកស្អាតជូនប្រជាពលរដ្ឋនៅក្នុងស្រុកកោះញែក និងស្រុក​កែវ​សីមា ។

លោកជំទាវមានប្រសាសន៍បន្តថា ក្នុងបរិបទនៃជំងឺកូវីដ-១៩ និងស្របពេលបើកសាលាឱ្យសិស្សបានចូលរៀនឡើងវិញ សម្ដេចកិត្តិព្រឹទ្ធបណ្ឌិត ប៊ុន រានី ហ៊ុន សែន បានសម្រេ​ច​​ឱ្យមានសកម្មភាពសាងសង់កន្លែង​លាងសម្អាតដៃជូនដល់សាលាចំនួន ០៧ នៅស្រុកកោះញែក និងស្រុកកែវសីមា សម្រាប់ការប្រើប្រាស់លើកកម្ពស់សុខភាពអនាម័យ និងចូល​រួមកាត់ផ្ដាច់ការចម្លងជំងឺកូវីដ-១៩ ៕