រោងចក្រប្រព្រឹត្តកម្មទឹកស្អាតម្លេចផលិតទឹកស្អាតបាន ២ពាន់ម៉ែត្រគុបក្នុងមួយថ្ងៃ
កំពត - ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ពោធដាក់ឱ្យប្រើប្រាស់រោងចក្រប្រព្រឹត្តកម្មទឹកស្អាត “ម្លេច” ជាផ្លូវការ កាលពីព្រឹកថ្ងៃទី១០ ខែឧសភាកន្លងទៅ ។ រោងចក្រប្រព្រឹត្តកម្មទឹកស្អាតនេះ ស្ថិតក្នុងភូមិបាក់នឹម ឃុំច្រេស ស្រុកជុំគីរី ខេត្កកំពត មានសមត្ថភាពអាចផលិតទឹកស្អាតបានប្រមាណ ២ពាន់ម៉ែត្រត្រីគុណ (ម៉ែត្រគុប) ក្នុងមួយថ្ងៃ ។
ទឹកស្អាតចេញពីរោងចក្រប្រព្រឹត្តកម្មទឹកស្អាតម្លេច អាចប្រើសម្រាប់ចែកចាយឱ្យប្រពលរដ្ឋមួយផ្នែកក្នុងស្រុកជុំគិរី មួយផ្នែកក្នុងស្រុកឈូក និងស្រុកអង្គរជ័យ និងប្រជាពលរដ្ឋមួយផ្នែកនៃខេត្តតាកែវ។
ឯកឧត្តម ស៊ឹម ស៊ីថា រដ្ឋលេខាធិការក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា រោងចងចក្រប្រព្រឹត្តិកម្មទឹកស្អាតម្លេច រអាចផ្តល់ទឹកស្អាតប្រើប្រាស់សម្រាប់ប្រជាពលរដ្ឋប្រមាណ ៤ម៉ឺននាក់ ឬប្រហែលជា ១ម៉ឺនគ្រួសារ ។
ឯកឧត្តម សុឹម សុីថា បានបញ្ជាក់ទៀតថា វិស័យទឹកស្អាតនៅកម្ពុជាបានពង្រឹងការគ្រប់គ្រង និងបានអភិវឌ្ឍន៍ជាលំដាប់ដើម្បីឆ្លើយតបទៅនឹងតម្រូវការប្រើប្រាស់ក្នុងជីវភាពរស់នៅរបស់ប្រជាពលរដ្ឋ និងការកសាងហេដ្ឋារចនាសម្ព័ន្ធ ការពង្រីកមូលដ្ឋានអាជីវកម្មគ្រប់ប្រភេទគ្រប់វិស័យ ដែលកំពុងមានកំណើនស្ទុះទៅមុខឥតឈប់ឈរនៅគ្រប់ទីកន្លែង។
ចំណែកឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ មានប្រសាន៍ថា រោងចក្រប្រព្រឹត្តិកម្មទឹកស្អាតម្លេច និងប្រព័ន្ធចែកចាយទឹក ព្រមទាំងហេដ្ឋារចនាសម្ព័ន្ធ ចាប់ផ្តើមសាងសង់នៅថ្ងៃទី២៤ ខែធ្នូ ឆ្នាំ២០១៨ និងបញ្ចប់ដំណេីរការសាកល្បងផលិតទឹកស្អាតនៅថ្ងៃទី០៩ ខែមិថុនា ឆ្នាំ២០២០ ដោយចំណាយថវិកាអស់ ១ម៉ឺនប្រាំមួយរយហុកសិបលានរៀល (១០ពាន់៦៦០លានរៀល)។
បើតាមឯកឧត្តម អ៊ឹង ឆាយ អភិបាលរងខេត្តកំពត បានឱ្យដឹងថា ខេត្តកំពតមានអង្គភាពរដ្ឋាករទឹកខេត្តកំពត និងសេវាកម្មផ្គត់ផ្គង់ទឹកស្អាតឯកជនចំនួន ១៨មូលដ្ឋាន ដែលគ្រប់ដណ្តប់លើពីរក្រុង និងប្រាំពីរស្រុក ស្មើនឹង ២៤៤ភូមិក្នុង ៧៣ឃុំ-សង្កាត់ មានប្រជាពលរដ្ឋក្នុងតំបន់សេវាចំនួន ៥២.៥៧១គ្រួសារ ស្មើនឹង ២៥៦.១៣៥នាក់ ៕
អត្ថបទថ្មីៗ
អត្ថបទពេញនិយម
