រដ្ឋបាលស្រុកបន្ទាយស្រីប្តេជ្ញារយៈពេល ៦ខែទៀតនឹងមានបង្គន់អនាម័យគ្រប់ខ្នងផ្ទះអ្នកភូមិ
សៀមរាប - លោកឃឹម ហ្វីណង់ អភិបាលស្រុកបន្ទាយស្រី ខេត្តសៀមរាប មានប្រសាសន៍ថា តាមការគ្រោងទុកត្រឹមរយៈពេល ៦ខែខាងមុខ ស្រុកបន្ទាយស្រីទាំងមូលនឹងមានបង្គន់អនាម័យប្រើប្រាស់គ្រប់ខ្នងផ្ទះ ។
លោកមានប្រសាសន៍ដូចនេះ នៅក្នុងសិក្ខាសាលាពន្លឿនស្ថានភាពបញ្ឈប់ការបន្ទោរបង់ពាសវាលពាសកាល ក្រោមអធិបតីភាព ឯកឧត្តម ថោង ពោធ អនុរដ្ឋលេខាធិកាក្រសួងអភិវឌ្ឍន៍ជនបទ ព្រមទាំងមានការចូលរួមពីមន្ត្រីក្រសួងអភិវឌ្ឍន៍ជនបទ អង្គការភ្លែនអន្តរជាតិ អង្គការយូរីដូ ព្រមទាំងអាជ្ញាធរមូលដ្ឋាន កាលពីថ្ងៃទី១០ ខែមករា ឆ្នាំ២០២២ កន្លងទៅ ។
"ខ្ញុំជឿជាក់ថាយើងនឹងអាចសម្រេចគោលដៅមួយនេះបាន ដើម្បីលើកកម្ពស់ភាពថ្លៃថ្នូរ និងភាពសុីវីល័យនៃគុណភាពជីវិតនៅតាមទីជនបទ ឱ្យស័ក្តិសមជាប្រជាពលរដ្ឋរស់នៅក្នុងស្រុកទេសចរណ៍មួយ" ។ នេះបើតាមការបញ្ជាក់របស់លោកឃឹម ហ្វីណង់ អភិបាលស្រុកបន្ទាយស្រី ខេត្តសៀមរាប ។
នៅក្នុងសិក្ខាសាលាពន្លឿនស្ថានភាពបញ្ឈប់ការបន្ទោរបង់ពាសវាលពាសកាលនេះ លោកមេឃុំទាំង៦ និងភូមិទាំង៣៦ នៅក្នុងស្រុកបន្ទាយស្រីទាំងមូលបានប្តេជ្ញាចិត្តពន្លឿនស្ថានភាពអនាម័យស្រុកឱ្យល្អប្រសើរ ដោយសាងសង់បង្គន់អនាម័យចំនួនជាង ៣ពាន់បង្គន់ ដើម្បីបង្គ្រប់តាមផ្ទះប្រជាពលរដ្ឋ ។
សូមជម្រាបថា រដ្ឋបាលស្រុកបន្ទាយស្រី បានបញ្ជាក់ថា អត្រាមានបង្គន់អនាម័យប្រើប្រាស់នៅក្នុងស្រុកបន្ទាយស្រីកើនឡើងពីក្រោម ៧០% ទៅដល់ ១០០% ក្នុងរយៈពេលដ៏ខ្លីខាងមុខ ។ ការកើនឡើងនេះ ដោយមានការគាំទ្រពីក្រសួងអភិវឌ្ឍន៍ជនបទ និងអង្គការដៃគូ ជាពិសេសការចូលរួមទូលំទូលាយពីអាជ្ញាធរមូលដ្ឋាន និងប្រជាពលរដ្ឋនៅក្នុងស្រុកទាំងមូល ៕