អង្គការហេទ្បែនខេលល័របន្តគាំទ្រអ្នកសារព័ត៌មានផ្សព្វផ្សាយពីចំណេះដឹងអាហារូបត្ថម្ភ
ភ្នំពេញ - ផ្នែកមួយនៃការផ្សព្វផ្សាយចំណេះដឹងស្តីពីការលើកកម្ពស់សន្តិសុខស្បៀង អាហារូបត្ថម្ភ ទឹកស្អាត និងអនាម័យនៅកម្ពុជាឱ្យកាន់តែទូលំទូលាយ និងក្លាយជាប្រយោជន៍ដល់សាធារណជន អង្គការហេទ្បែន ខេលល័រ អន្តរជាតិកម្ពុជា នឹងបន្តគាំទ្រសកម្មភាពពង្រឹងចំណេះដឹងអាហារូបត្ថម្ភដល់អ្នកសារព័ត៌មាន និងបង្កើតកម្មវិធីលើកទឹកចិត្តអ្នកសារព័ត៌មានតាមរយៈការជ្រើសរើសអត្ថបទសារព័ត៌មានឆ្នើមបន្តទៀតសម្រាប់ឆ្នាំ២០២៤ ។
លោក ហ៊ូ ក្រើន នាយកប្រចាំប្រទេសនៃអង្គការហេទ្បែន ខេលល័រ អន្តរជាតិកម្ពុជា បានបញ្ជាក់បន្ថែមថា បទពិសោធន៍ជ្រើសរើសអត្ថបទសារព័ត៌មានជើងឯកអាហារូបត្ថម្ភ ៤លើកកន្លងទៅ បានរកឃើញថា ប្រធានបទព័ត៌មានដែលអ្នកសារព័ត៌មានបានចងក្រង និងផ្សព្វផ្សាយ បានផ្តល់ឱកាសជាច្រើនដល់គ្រប់ភាគីពាក់ព័ន្ធ អាចរំលែកចំណេះដឹង ការអប់រំ និងសកម្មភាពការងាររបស់ខ្លួនក្នុងផ្នែកលើកកម្ពស់ការចិញ្ចឹមទារក និងកុមារ សុខភាពសាធារណៈ សន្តិសុខស្បៀង អាហារូបត្ថម្ភ ទឹកស្អាត និងអនាម័យនៅកម្ពុជា ។ ជាមួយគ្នានេះ នាយកប្រចាំប្រទេសនៃអង្គការហេទ្បែន ខេលល័រ អន្តរជាតិកម្ពុជា បានអបអរសារទ និងលើកទឹកចិត្តដល់អ្នកសារព័ត៌មានគ្រប់រូប ត្រូវខិតខំចូលរួមបន្ថែមទៀត ដើម្បីបំពេញបេសកកម្មរួមគ្នាអភិវឌ្ឍមូលធនមនុស្ស សេដ្ឋកិច្ច និងសង្គមជាតិ ។
លោក ហ៊ូ ក្រើន នាយកប្រចាំប្រទេសនៃអង្គការហេទ្បែន ខេលល័រ អន្តរជាតិកម្ពុជា ៖ "ខ្ញុំសូមអបអរសាទរ និងគាំទ្រលើកទឹកចិត្តដល់អ្នកសារព័ត៌មានជើងឯកអាហារូបត្ថម្ភទាំងអស់ សូមបន្តផលិត ចងក្រង និងផ្សព្វផ្សាយព័ត៌មានពាក់ព័ន្ធប្រធានបទសន្តិសុខស្បៀង និងអាហារូបត្ថម្ភបន្តទៀត ហើយយើងនៅតែគាំទ្រដំណើរការប្រកួតប្រជែងជាបន្តបន្ទាប់" ។
សូមជម្រាបថា រយៈពេលជាងពីរឆ្នាំកន្លងទៅ ចាប់តាំងពីឆ្នាំ២០២២ អ្នកសារព័ត៌មានប្រមាណជាង ៣០នាក់មកពីចម្រុះស្ថាប័នផ្សព្វផ្សាយនៅកម្ពុជា បានទទួលការបណ្តុះបណ្តាលចំណេះដឹងទាក់ទងនឹងសន្តិសុខស្បៀង និងអាហារូបត្ថម្ភ ជាពិសេសផ្តោតលើមូលដ្ឋានគ្រឹះអាហារូបត្ថម្ភ របបអាហារសុខភាព ប្រព័ន្ធស្បៀង សុវត្ថិភាពចំណីអាហារនិងការកែច្នៃអាហារ និងការបញ្ចូលមីក្រូសារជាតិក្នុងចំណីអាហារ ដែលចំណេះដឹងទាំងអស់នេះសំខាន់សម្រាប់ការរស់នៅ និងអនុវត្តនៅក្នុងការងារជាក់ស្តែង ៕