គុណតម្លៃទាំង៥ កើតចេញពីទម្លាប់ប្រើប្រាស់បង្គន់អនាម័យនៅតាមគ្រួសារ
ភ្នំពេញ - គ្រប់គ្រងកាកសំណល់លាមកមនុស្សមិនបានល្អ នឹងបំពុលដល់ទឹក អាហារ និងដីដោយមេរោគ ហើយបង្កឱ្យមានជំងឺរាក ភ្នែក ស្បែក ដង្កូវព្រូន និងបញ្ហាសុខភាពផ្សេងៗទៀត ។ អ្នកជំនាញសុខភាពជនបទ បានបញ្ជាក់ថា ការប្រើប្រាស់បង្គន់អនាម័យអាចរារាំងមេរោគទាំងនោះមិនឱ្យចូលទៅក្នុងបរិស្ថាន ព្រមទាំងការពារសុខភាពប្រជាសហគមន៍ទាំងមូល ។
ទន្ទឹមគ្នានេះ សុខភាពមិនមែនជាមូលហេតុតែមួយគត់ ដែលត្រូវសាងសង់និងប្រើប្រាស់បង្គន់អនាម័យនោះទេ ផ្ទុយទៅវិញបង្គន់អនាម័យបានបង្ហាញពីតម្លៃនៃឯកជនភាពនៅក្នុងគ្រួសារ សុវត្ថិភាព ភាពងាយស្រួល ភាពស្អាត និងតម្លៃនៃការគោរពក្នុងជីវភាពរស់នៅ ។
១. ភាពឯកជន ៖ គ្រាន់តែសង់បង្គន់អនាម័យមានលក្ខណៈសាមញ្ញត្រឹមតែរណ្តៅជ្រៅនៅក្នុងដីប៉ុណ្ណោះ ក៏អាចបង្ហាញពីតម្លៃនៃឯកជនភាពរបស់មនុស្សបានដែរ ។ ភាពឯកជន គឺជាចំណុចសំខាន់ដែលត្រូវសង់បង្គន់ដោយមានរោងដ៏ល្អមួយ មានទ្វារ ឬក្រណាត់បិទបាំង។ រោងបង្គន់អាចធ្វើពីវត្ថុធាតុដើមក្នុងស្រុក ឬក៏អាចធ្វើពីបេតុង ។
២. សុវត្ថិភាព ៖ ដើម្បីឱ្យបង្គន់មួយមានសុវត្ថិភាព ត្រូវសាងសង់វាឱ្យបានល្អ និងនៅទីកន្លែងមានដែលសុវត្ថិភាព ។ ចូរចាំដែរថា គ្មាននរណាម្នាក់ប្រើប្រាស់បង្គន់នោះទេ ប្រសិនបើពួកគេព្រួយបារម្ភពីការដួលរលំ។ ស្របគ្នានេះ បង្គន់មិនត្រូវសង់ឆ្ងាយពីផ្ទះ ឬនៅទីដាច់ស្រយាលឡើយ ពុំនោះស្ត្រីប្រហែលជាគ្មានអារម្មណ៍សុវត្ថិភាពក្នុងពេលប្រើវានោះទេ ។
៣. ភាពងាយស្រួល ៖ មនុស្សទំនងជាប្រើបង្គន់ដែលងាយស្រួលអង្គុយ ឬអង្គុយច្រហោង ព្រមទាំងមានរោងធំល្មមអាចឈរបាន និងទូលាយ ។ បង្គន់អនាម័យស្ថិតនៅជិតផ្ទះ ងាយស្រួលប្រើប្រាស់បំផុត ។
៤. ភាពស្អាត ៖ បើបង្គន់មានភាពកខ្វក់ និងមានក្លិនមិនល្អ នោះគ្មាននរណាចង់ប្រើវាទេ។ បង្គន់ត្រូវតែស្អាត ដើម្បីបងា្ករការឆ្លងរាលដាលនៃមេរោគ ។ ការផ្លាស់វេនគ្នាសម្អាតបង្គន់នឹងជួយឱ្យប្រាកដថា បង្គន់អនាម័យនោះ បានប្រើប្រាស់និងថែរក្សាយ៉ាងត្រឹមត្រូវ ។
៥. ការគោរព ៖ មានបង្គន់អនាម័នៅក្នុងគ្រួសារ បានបង្ហាញពីភាពថ្លៃថ្នូរនៃឥរិយាបថរស់នៅនិងការគោរពដល់សមាជិកគ្រួសារ ព្រមទាំងភ្ញៀវដែលមកលេងផ្ទះ ។ តម្លៃមួយនេះសំខាន់ខ្លាំងណាស់ ស្របតាមការរីកចម្រើនសង្គម សេដ្ឋកិច្ច ដែលតម្រូវឱ្យប្រជាជនចំណាយលុយនិងកម្លាំងដើម្បីសាងសង់បង្គន់។
អត្ថបទថ្មីៗ
អត្ថបទពេញនិយម
