អាជ្ញាធរខេត្តកណ្តាលនឹងមានវិធានការតឹងរឹងចំពោះអ្នកចោលសំរាមគ្មានសណ្តាប់ធ្នាប់តាមដងផ្លូវ
កណ្តាល - ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល មានប្រសាសន៍ថា វត្តមានសំរាមនិងសំណល់រឹងនៅតាមដងផ្លូវធ្វើឱ្យប៉ះពាល់ដលបរិស្ថានខេត្ត និងសុខភាពប្រជាជន ។ បញ្ហាបោះចោលសំរាមគ្មានសណ្តាប់ធ្នាប់ ដល់ពេលវេលាដែលអាជ្ញាធរខេត្តត្រូវមានវិធានតឹងរឹង ។ ឯកឧត្តមមានប្រសាសន៍ដូច្នេះ នៅក្នុងកិច្ចប្រជុំគណៈកម្មការដឹកនាំការងារគ្រប់គ្រងសំរាម និងសំណល់រឹងទាំង ១១ក្រុង-ស្រុក ក្នុងភូមិសាស្ត្រខេត្តកណ្តាល នាព្រឹកថ្ងៃទី១៧ ខែកុម្ភៈ ឆ្នាំ២០២២ ។
ឯកឧត្តម គង់ សោភ័ណ្ឌ មានប្រសាសន៍ស្នើឱ្យមន្ទីរជំនាញគ្រប់ជាន់ថ្នាក់ រួមមាន អាជ្ញាធរក្រុង ស្រុក ឃុំ និងភូមិ ត្រូវមានវិធានការតឹងរឹងចំពោះជនណាដែលបោះសំរាមចោលពាសវាលពាសកាល មិនស្តាប់តាមការណែនាំរបស់អាជ្ញាធរ ។
ទន្ទឹមគ្នានេះ ឯកឧត្តមបានលើកឡើងថា ក្រុមហ៊ុនដែលមានភារកិច្ចប្រមូលសំរាម ត្រូវកំណត់ឱ្យច្បាស់លាស់ពីម៉ោងពេលប្រមូលសំរាម ចៀសវាងកន្លែងខ្លះទុកឱ្យសំរាមធំក្លិនស្អុយទើបប្រមូល ។ រដ្ឋបាលក្រុង និងស្រុកនីមួយៗ ត្រូវចាត់ចែងរៀបចំ និងត្រួតពិនិត្យលើការផ្តល់សេវាប្រមូលសំរាម សំណល់រឹង ឱ្យមានវិសាលភាពគ្របដណ្តប់នៅគ្រប់ឃុំសង្កាត់ទាំងអស់ក្នុងដែនសមត្ថកិច្ចរបស់ខ្លួន និងត្រូវត្រួតពិនិត្យជាប្រចាំ ។
“តាមដានការអនុវត្តការងាររបស់ក្រុមហ៊ុនប្រមូល និងដឹកជញ្ជូនសំរាម ឬក្រុមហ៊ុនម៉ៅការប្រមូលសំរាមជាប្រចាំ ដើម្បីឱ្យការប្រមូលសំរាមបានស្អាត មានសុវត្ថិភាព និងទាន់ពេលវេលាតាមគោលដៅដែលត្រូវប្រមូល និងរៀបចំកែលម្អទីលានចាក់សំរាមឡើងវិញ និងឡដុតសំរាម ដោយអនុវត្តតាមបទដ្ឋានបច្ចេកទេស ប៉ះពាល់ដល់សុខភាពប្រជាពលរដ្ឋរស់នៅក្បែរនោះ” ។ នេះបើតាមការបញ្ជាក់របស់ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល ។
សូមជម្រាបថា នៅក្នុងកិច្ចប្រជុំគណៈកម្មការដឹកនាំសម្របសម្រួល ស្តីពីការគ្រប់គ្រងសំរាម និងសំណល់រឹង ឯកឧត្តមអភិបាលខេត្ត បានណែនាំដល់រដ្ឋបាលក្រុងនិងស្រុក ត្រូវសហការរួមគ្នាជាមួយរដ្ឋបាលឃុំសង្កាត់ណែនាំប្រជាពលរដ្ឋ កម្មករនិយោជិក អាជីករ អ្នកលក់ដូរតាមចិញ្ចើមផ្លូវ អ្នកលក់ដូរតាមរោងចក្រ ម្ចាស់ការដ្ឋានសាងសង់ឱ្យទុកដាក់សំរាម សំណល់រឹងរបស់ខ្លួនបានត្រឹមត្រូវ ដើម្បីលើកកម្ពស់បរិស្ថាននិងការរស់នៅស្អាត ៕