មន្ត្រីថែទាំសុខភាពជនបទបន្តអប់រំពីជំងឺផ្លូវដង្ហើមកូវីដ-១៩ នៅខេត្តកំពង់ចាម
កំពង់ចាម - មន្ត្រីជំនាញថែទាំសុខភាពជនបទ នៃក្រសួងអភិវឌ្ឍន៍ជនបទ បន្តយុទ្ធនាការអប់រំសុខភាពប្រជាពលរដ្ឋពីជំងឺផ្លូវដង្ហើមកូវីដ-១៩ នៅស្រុកកងមាស ខេត្តកំពង់ចាម ។ យុទ្ធនាការផ្សព្វផ្សាយវិធានការការពារ និងទប់ស្កាត់ការរីករាលដាលជំងឺនេះ ធ្វើឡើងនៅព្រឹកថ្ងៃអង្គារ៍កន្លងទៅ ។
លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទបានដឹកនាំក្រុមការងារលើកកម្ពស់អនាម័យជន អាជ្ញាធរមូលដ្ឋានស្រុកកងមាស ខេត្តកំពង់ចាម បានចុះផ្សព្វផ្សាយពីវិធានការការពារ ទប់ស្កាត់ការរីករាលដាលជំងឺកូវីដ-១៩ ដល់ខ្នងផ្ទះប្រជាពលរដ្ឋនៅតាមភូមិក្នុងឃុំទាំង១១ នៃស្រុកកងមាស ។
ទន្ទឹមគ្នានេះដែរ លោក ភោគ សាវុធ អភិបាលនៃគណៈអភិបាលស្រុកកងមាស មានប្រសាសន៍ប្តេជ្ញាថា រដ្ឋបាលស្រុកនិងអាជ្ញារធរមូលដ្ឋាននៅបន្តអប់រំផ្សព្វផ្សាយវិធានការការពារ ទប់ស្កាត់ការរីករាលដាលនៃជំងឺកូវីដ-១៩ ដល់ប្រជាពលរដ្ឋជានិច្ច ព្រមទាំងបង្កើនការប្រុងប្រយត្ន័ខ្ពស់ តាមរយៈរក្សាអនាម័យខ្លួនប្រាណជាប្រចាំ លាងសម្អាតដៃជាមួយសាប៊ូ អាល់កុល ឬជែល កាត់បន្ថយការជួបជុំគ្នាច្រើន និងពាក់ម៉ាស់ជាប្រចាំ ។
សូមបញ្ចាក់ថា នាយកដ្ឋានថែទាំសុខភាពជនបទ បានប្រគល់សម្ភារៈមួយចំនួនទៅរដ្ឋបាលឃុំទាំង១១ ដោយក្នុងមួយឃុំទទួលបានទឹកអាល់កុលចំនួន ១០លីត្រ ម៉ាសចំនួន ២ប្រអប់ សាប៊ូ ២៧០ដុំ និងផ្ទាំងរូបភាពអប់រំចំនួន ២៧៩០សន្លឹក ព្រមទាំងថវិកាមួយចំនួនសម្រាប់បន្តចុះផ្សព្វផ្សាយនៅតាមមូលដ្ឋានរបស់ខ្លួន។ យុទ្ធនាការផ្សព្វផ្សាយនេះ ចូលរួមគាំទ្រពីក្រុមប្រឹក្សាសហប្រតិបត្តិការវិស័យផ្គត់ផ្គង់ទឹកស្អាត និងអនាម័យជនបទនៃអង្គការសហប្រជាជាតិ ហៅកាត់ថា WSSCC ។
កន្លងទៅស្រុកកងមាស ខេត្តកំពង់ចាម បានរកឃើញករណីជម្ងឺកូវីដ១៩ លើប្រជាពលរដ្ឋចំនួន ០៨រូប ក្នុងនោះជនជាតិខ្មែរមួយរូប និងជនជាតិម៉ាឡេប្រាំពីររូប ។ បច្ចុប្បន្នករណីកូវីដ-១៩ ទាំងប្រាំបីនាក់នៅស្រុកកងមាស បានព្យាបាលជាសះស្បើយ និងបានវិលត្រឡប់ទៅកាន់ស្រុកកំណើតរៀងៗខ្លួន ៕
អត្ថបទថ្មីៗ
អត្ថបទពេញនិយម
