អូស្ត្រាលីបន្តជួយកម្ពុជាតាមរយៈគម្រោង 3i អភិវឌ្ឍន៍វិស័យទឹកស្អាតឱ្យកាន់តែប្រសើរឡើង
ភ្នំពេញ - ឯកឧត្តមរដ្ឋមន្ត្រីក្រសួងឧស្សាហ៍កម្ម បានកោតសរសើរចំពោះលទ្ធផលបំពេញបេសកកម្មការទូតរបស់ឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា ព្រមទាំងបានជំរុញការងារគម្រោងអភិវឌ្ឍន៍ក្នុងវិស័យហេដ្ឋារចនាសម្ព័ន្ធ និងអភិវឌ្ឍន៍លើវិស័យទឹកស្អាតនៅកម្ពុជា ។
ជំនួបនេះធ្វើឡើងនៅរសៀលថ្ងៃទី២៨ ខែកក្កដា ឆ្នាំ២០២០ នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងបំណងសម្តែងការគួរសម និងពិភាក្សាការងារមួយចំនួនដែលអូស្ត្រាលីនិងកម្ពុជាធ្វើរួមគ្នា ។
ទាក់ទងនឹងគម្រោងលើកកម្ពស់ទឹកស្អាត ឯកឧត្តមរដ្ឋមន្ត្រីក្រសួងឧស្សាហ៍កម្ម មានប្រសាសន៍ថា តាមរយៈគម្រោង3i ឬ Investing in Infrastructure ក្រសួងឧស្សាហ៍កម្មកំពុងបន្តអនុវត្តការងារតបណ្តាញទឹកស្អាតជូនដល់ប្រជាពលរដ្ឋដោយឥតគិតថ្លៃក្នុងតំបន់មួយចំនួន ព្រមទាំងទទួលបានការគាំទ្រយ៉ាងខ្លាំង ។
ទន្ទឹមគ្នានេះ ឯកឧត្តមរដ្ឋមន្ត្រីក្រសួងឧស្សាហ៍កម្ម បានបន្ថែមថា អនុវត្តវិធីសាស្ត្រមិនយកថ្លៃប្រើប្រាស់ទឹកក្នុងតំបន់ណាមួយ មិនអាចធានានិរន្តរភាពយូរអង្វែងបានឡើយ ដោយសារបង្ហាញពីភាពកំសោយផ្នែកគ្រប់គ្រងនិងថែរក្សា ហើយឈានទៅជួបបញ្ហាទៅថ្ងៃក្រោយ ។
ឯកឧត្តមបានបន្តថា ដើម្បីធានានិរន្តរភាពយូរអង្វែងក្នុងការគ្រប់គ្រងបណ្តាញទឹកស្អាត រដ្ឋាភិបាលបានដាក់ចេញគោលនយោបាយរួចជាស្រេចក្នុងការអនុគ្រោះថ្លៃប្រើប្រាស់ទឹកចំពោះប្រជាពលរដ្ឋដែលមានជីវភាពក្រីក្រ និងប្រជាពលរដ្ឋក្នុងកម្រិតជីវភាពមធ្យមជាដើម ។
ចំណែកឯកឧត្តម Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា បានបង្ហាញការគាំទ្រ និងស្វែងយល់ពីដំណើរការផ្គត់ផ្គង់ទឹកស្អាតនៅកម្ពុជា ។ ឯកឧត្តមឯកអគ្គរដ្ឋទូត បានបន្ថែមថា នៅពេលខាងមុខ ភាគីទាំងពីរនឹងពង្រឹងទំនាក់ទំនងបន្ថែមទៀត ដើម្បីអភិវឌ្ឍវិស័យទឹកស្អាតនៅកម្ពុជារាប់ទាំងការវិនិយោគ និងជំរុញវិស័យឯកជនផងដែរ ៕