កម្មការិនីកម្ពុជា ២ម៉ឺននាក់នឹងទទួលបានចំណេះដឹងអាហារូបត្ថម្ភ និងការចិញ្ចឹមកូននៅកន្លែងធ្វើការ
ភ្នំពេញ - អង្គការលើកកម្ពស់ចំណេះដឹងអាហារូបត្ថម្ភ Helen Keller រំពឹងថា បុគ្គលិក កម្មករ និងកម្មការិនីកម្ពុជាប្រមាណជាង ២ម៉ឺននាក់នឹងទទួលបានចំណេះដឹងស្តីពីអាហារូបត្ថម្ភ និងការចិញ្ចឹមទារកនិងកុមារនៅកន្លែងធ្វើការ ។ ការផ្តល់ចំណេះដឹងតាមរយៈការសាកល្បងអនុវត្តគម្រោងលើកកម្ពស់សុខភាព អាហារូបត្ថម្ភ និងការចិញ្ចឹមទារកនិងកុមារនៅតាមរោងចក្រ សហគ្រាស និងកន្លែងធ្វើការ មានរយៈពេល ១៨ខែ កំពុងចាប់ផ្តើមអនុវត្តនៅឆ្នាំ២០២២ ។ នេះបើតាមការបញ្ជាក់របស់លោក ហ៊ូ ក្រើន នាយករងអង្គការ Helen Keller អន្តរជាតិ ប្រចាំកម្ពុជា ។
លោក ហ៊ូ ក្រើន បានឱ្យដឹងថា បច្ចុប្បន្នអង្គការ Helen Keller និងគម្រោង MUSEFO របស់អង្គការ GIZ សហការជាមួយក្រសួងស្ថាប័នពាក់ព័ន្ធ អង្គការសង្គមស៊ីវិល ទីភ្នាក់ងារអង្គការសហប្រជាជាតិ និងដៃគូឯកជនកំពុងរៀបចំដំណើរការសាកល្បងការអនុវត្តគម្រោងលើកកម្ពស់សុខភាព អាហារូបត្ថម្ភ និងការចិញ្ចឹមទារកនិងកុមារនៅតាមរោងចក្រ សហគ្រាស និងកន្លែងធ្វើការ ។
អ្នកជំនាញលើកកម្ពស់អាហារូបត្ថម្ភរូបនេះ បានបន្តទៀតថា គម្រោងនេះនឹងផ្តល់ជាវេទិកាមួយដល់ស្ត្រី ដើម្បីពួកគេមានឱកាសចូលរួមក្នុងកម្មវិធីសំខាន់ផ្សេងៗ ដូចជា ការអប់រំអាហារូបត្ថម្ភនិងអនាម័យ ការអប់រំស្តីពីការចិញ្ចឹមទារកនិងកុមារ ការប្រឹក្សាលើរបបអាហារនិងសុខភាពរបស់ស្រ្តី និងច្បាប់ការងារ ។
“គម្រោងនេះក៏នឹងផ្តល់សម្ភារៈអប់រំផ្សព្វផ្សាយនិងឧបករណ៍មួយចំនួន ដូចជា ទី១. សម្ភារបរិក្ខារសម្រាប់បំពាក់នៅក្នុងបន្ទប់បំបៅដោះកូននៅតាមរោងចក្រសហគ្រាសនិងកន្លែងធ្វើការគោលដៅនីមួយៗ ដូចជា ទូទឹកកក តុ កៅអី កង្ហារ ម៉ាស៊ីនបូមទឹកដោះ កន្សែងជូតដៃ និងសាប៊ូលាងដៃជាដើម និងទី២. សម្ភារប្រាស្រ័យទាក់ទងដើម្បីការផ្លាស់ប្តូរឥរិយាបថ”។ នេះជាការបញ្ជាក់បន្ថែមរបស់លោក ហ៊ូ ក្រើន នាយករងអង្គការ Helen Keller អន្តរជាតិ ប្រចាំកម្ពុជា ។
គម្រោងរយៈពេល ១៨ខែនេះ នឹងជ្រើសរើសកន្លែងធ្វើការ ៤ប្រភេទ ដើម្បីអនុវត្តសាកល្បងលើកកម្ពស់អាហារូបត្ថម្ភ និងការចិញ្ចឹមទារកនិងកុមារនៅកន្លែងធ្វើការ រួមមាន រោងចក្រ ស្ថាប័នរដ្ឋ ធនាគារ និងការិយាល័យអង្គការមិនមែនរដ្ឋាភិបាល ឬអង្គការសហប្រជាតិ ដែលស្ថិតនៅរាជធានីភ្នំពេញ ខេត្តកណ្តាល ខេត្តកំពត និងខេត្តកំពង់ធំ ។
សូមជម្រាបថា តាមការសិក្សាស្រាវជ្រាវមួយធ្វើឡើងជាមួយកម្មករ-កម្មការនីរោងចក្រនៅឆ្នាំ២០១៨ បោះពុម្ពផ្សាយលើទស្សនាវដ្តីឈ្មោះ Nutrients បានបញ្ជាក់ថា ជាទូទៅកម្មការិនីរោងចក្រនៅកម្ពុជា មានបញ្ហាស្លេកស្លាំង ទម្ងន់ទាបជាងស្តង់ដារ និងកង្វះជាតិដែក ។ ឆ្នាំ២០១៩ ការសិក្សាមួយបោះពុម្ពផ្សាយលើទស្សនាវដ្តីឈ្មោះ Maternal Child Health Journal ក៏បានឱ្យដឹងថា ជាទូទៅម្តាយនិងអ្នកថែទាំកុមារបានផ្លាស់ប្តូរពីការបំបៅកូនដោយទឹកដោះម្តាយជំនួសមកវិញនូវការបំបៅកូនដោយទឹកគោម្សៅផ្សំតាមរូបមន្ត ជាពិសេសនៅអំឡុងពេលម៉ោងធ្វើការសម្រាប់កុមារមានអាយុពី ៣-៤ ខែ ។
ស្របគ្នានេះដែរ អ្នកជំនាញសុខភាពសាធារណៈ និងស្ថាប័នពាក់ព័ន្ធផ្នែកអាហារូបត្ថម្ភទាំងអស់នៅកម្ពុជា កំពុងស្វែងរកដំណោះស្រាយសមស្របដើម្បីលើកកម្ពស់សុខភាព និងអាហារូបត្ថម្ភលើកម្មករ កម្មការនីទាំងនោះ ដើម្បីឱ្យពួកគេមានសុខភាពនិងអាហារូបត្ថម្ភល្អ ជួយជំរុញឱ្យផលិតភាពរបស់ពួកគេឱ្យមានភាពរឹងមាំ ព្រមទាំងលើកកម្ពស់សកម្មភាពការបំបៅដោះកូនដោយទឹកដោះម្តាយ ៕
អត្ថបទថ្មីៗ
អត្ថបទពេញនិយម
