ភ្នំពេញ - ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន ១៨០លានដុល្លារអាម៉េរិកជួយដល់ក្រុងចំនួនបីនៅកម្ពុជា ដើម្បីរៀបចំហេដ្ឋារចនាសម្ព័ន្ធទីក្រុង និងបង្កើនលទ្ធភាពប្រកួតប្រជែងផ្នែកសេដ្ឋកិច្ចឱ្យកាន់តែប្រសើរឡើង។ នេះបើតាមសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ី (ADB) ពីថ្ងៃទី១៩ វិច្ឆិកា ២០២១ កន្លងទៅ ។

គម្រោងវិនិយោគក្រុងទាំងបី រួមមាន ក្រុងបាវិតនៃខេត្តស្វាយរៀង, ក្រុងកំពតនៃខេត្តកំពត, និងក្រុងប៉ោយប៉ែតនៃខេត្តបន្ទាយមានជ័យ។ តាមរយៈគម្រោងនេះនឹងជួយប្រជាពលរដ្ឋបានជាង ១៤ម៉ឺននាក់ ។ 

តាមការបញ្ជាក់ពី ADB គម្រោងអភិវឌ្ឍន៍នេះ នឹងជួយឱ្យក្រុងទាំងបីទទួលបានសេវាគ្រប់គ្រងទឹកលូ និងសំណល់រឹងបានល្អប្រសើរ ព្រមទាំងរៀបចំប្រព័ន្ធបង្ហូរទឹកភ្លៀង និងប្រព័ន្ធលូបង្ហូរទឹកក្នុងទីក្រុង ដើម្បីអាចកាត់បន្ថយទឹកជំនន់ ។

អ្នកឯកទេសអភិវឌ្ឍន៍ទីក្រុងរបស់ធនាគារអភិវឌ្ឍន៍អាស៊ី លោកស្រី Wei Kim Swain មានប្រសាសន៍ថា “ប្រជាពលរដ្ឋកម្ពុជាកាន់តែច្រើនកំពុងផ្លាស់ទីលំនៅទៅកាន់ក្រុងលំដាប់ទីពីរ ប៉ុន្តែលទ្ធភាពទទួលបានហេដ្ឋារចនាសម្ព័ន្ធនិងសេវាកម្មទីក្រុង រួមទាំងបរិស្ថានមិនសូវល្អ ធ្វើឱ្យជីវភាពរស់នៅកាន់តែលំបាក និងប៉ះពាល់ដល់កំណើនសេដ្ឋកិច្ចទីក្រុង ។

លោកស្រី Wei Kim Swain បានបញ្ជាក់ថា គម្រោងនេះនឹងជួយរាជរដ្ឋាភិបាលធ្វើឱ្យប្រសើរឡើងនូវការគ្រប់គ្រងទឹកស្អាត អនាម័យ និងកាកសំណល់ និងលើកកម្ពស់កម្រិតជីវភាពជាពិសេសក្នុងចំណោមគ្រួសារមានប្រាក់ចំណូលទាប ។

ធនាគារអភិវឌ្ឍន៍អាស៊ី បានកត់សម្គាល់ថា ចំនួនពលរដ្ឋរស់នៅទីក្រុងនៅកម្ពុជាបានកើនដល់ ៦លាននាក់ក្នុងឆ្នាំ២០១៩ ពី ២,៦លាននាក់ក្នុងឆ្នាំ២០០៨ ដែលបានបង្កជាបញ្ហាប្រឈមដល់រដ្ឋបាលក្រុងក្នុងការផ្តល់សេវាកម្ម ។ នៅឆ្នាំ២០១៩ ប្រមាណ ៤៧ ភាគរយនៃពលរដ្ឋរស់នៅទីក្រុងនៅកម្ពុជាទទួលបានការផ្គត់ផ្គង់ទឹកស្អាតតាមលំនៅឋាន ។ 

បន្ថែមលើនេះ ទឹកលូដែលមិនបានសម្អាត ជាទូទៅត្រូវបង្ហូរទៅក្នុងទីចំហរយៈលូរួម និងលូទឹកបង្កប់តាមផ្លូវ ឬដោយប្រយោលតាមប្រឡាយចំហ ។ ចំណែកសេវាកម្មសម្អាតសំណល់រឹងក៏នៅមានកម្រិត ។

សូមជម្រាបថា ផែនការយុទ្ធសាស្ត្រអភិវឌ្ឍន៍ជាតិកម្ពុជាឆ្នាំ ២០១៩-២០២៣ បានផ្តល់អាទិភាពដល់ការវិនិយោគលើហេដ្ឋារចនាសម្ព័ន្ធសាធារណៈ រួមទាំងការផ្គត់ផ្គង់ទឹកស្អាត និងអនាម័យ ហើយកំណត់ទិសដៅជាតិសម្រាប់ក្រុងទាំងអស់ ដើម្បីទទួលបានទឹកស្អាតត្រឹមឆ្នាំ២០២៥ និងពង្រឹងការគ្រប់គ្រងកាកសំណល់រឹង ៕