ភ្នំពេញ - បច្ចុប្បន្ន “ការចិញ្ចឹមទារក និងកុមារឱ្យមានសុខភាពល្អប្រសើរ” បានក្លាយជាប្រធានបទសំខាន់មួយ ដែលអ្នកជំនាញសុខភាពមាតា និងទារក ព្រមទាំងអង្គការដៃគូបានលើកយកមកជជែកពិភាក្សា ។ ទន្ទឹមគ្នានេះ ទាំងក្រសួងសុខាភិបាល ទាំងអ្នកជំនាញពាក់ព័ន្ធ បានបង្ហាញថា ទឹកដោះម្តាយសំខាន់បំផុត និង ជាមូលដ្ឋានអាហារូបត្ថម្ភតែមួយមុខគត់សម្រាប់ទារកនិងកុមារ អាយុពី ០ ដល់ ៦ខែ ឬលើសពីនេះ ។ កុមារចាប់ពីអាយុ ៦ខែឡើងទៅ ប្រសិនបើស្ត្រីផ្តល់ការបំបៅកូនដោយទឹកដោះម្តាយបន្ថែម ម្តាយនិងកូនកាន់តែមានសុខភាពល្អ គួបផ្សំនឹងការបន្ថែមអាហារផ្សេងៗ ។ 

លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល មានប្រសាសន៍ថា ទឹកដោះម្តាយសំខាន់បំផុតនិង ជាអាហារតែមួយមុខគត់សម្រាប់ទារកនិងកុមារអាយុពីសូន្យដល់ ៦ខែ ។ កន្លងទៅក្រសួងសុខាភិបាល និងអង្គការដៃគូ បានដាក់ឱ្យដំណើរការបន្ទប់បំបៅដោះកូននៅកន្លែងធ្វើការ ដើម្បីលើកកម្ពស់សុខភាពទារកនិងកុមារ ។ 

ការដាក់ឱ្យដំណើរការបន្ទប់បំបៅដោះកូននៅកន្លែងធ្វើការ តាមរយៈការផ្តល់កន្លែងសមស្របគាំទ្រម្តាយគ្រប់រូបបំបៅកូនដោយទឹកដោះម្តាយឱ្យបានពេញលេញ គឺស្របតាមការប្តេជ្ញាចិត្តរបស់រដ្ឋាភិបាលកម្ពុជា ជំរុញសកម្មភាពបំបៅទឹកដោះម្តាយឱ្យបានដល់ ៨៥% ត្រឹមឆ្នាំ២០៣០ ខាងមុខ ។

លោកជំទាវវេជ្ជបណ្ឌិត ប្រាក់ សោភ័ណនារី មានប្រសាសន៍បញ្ជាក់ថា ដើម្បីចូលរួមអនុវត្តការប្តេជ្ញាចិត្តរបស់កម្ពុជាបង្កើនអត្រាការបំបៅកូនដោយទឹកដោះម្តាយតែមួយមុខគត់សម្រាប់ទារកនិងកុមារអាយុពីសូន្យដល់ ៦ខែ ឱ្យបានដល់ ៨៥% នៅឆ្នាំ២០៣០ ។ 

“ខ្ញុំសូមអំពាវ នាវ និងលើកទឹកចិត្តដល់ក្រសួង ស្ថាប័ន មន្ទីរ រោងចក្រសហគ្រាស ម្ចាស់ជំនួយ អង្គការសហប្រជាតិ អង្គការសង្គមស៊ីវិល ដៃគូឯកជនទាំងអស់ សូមចូលរួមលើកកម្ពស់ការបំបៅដោះកូនដោយទឹកដោះម្តាយនៅកន្លែងធ្វើការ ជាពិសេសសម្របសម្រួលឱ្យ មានបន្ទប់បំបៅដោះកូននៅគ្រប់ កន្លែងធ្វើការទាំងអស់ ដើម្បីឱ្យ ស្ត្រី អាចបន្តការបំបៅដោះកូនដោយងាយស្រួលបន្ទាប់ពីត្រឡប់ចូលធ្វើការវិញ” ។ ប្រសាសន៍លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល ។

ចំណែកលោកស្រីវេជ្ជបណ្ឌិត គឹម រ័ត្ននា ប្រធានមជ្ឈមណ្ឌលជាតិគាំពារមាតានិងទារក មានប្រសាសន៍ថា ការបង្កើតបន្ទប់បំបៅដោះកូន និងទារកដ្ឋាន បានជួយឱ្យម្តាយ មានឱកាសមើលថែកូនបានពេញលេញនៅកន្លែងធ្វើការ និងជាកន្លែងសមរម្យបន្តបំបៅដោះកូនដោយ កក់ក្តៅ ។ លើសពីនេះ ស្ត្រីជាម្តាយអាចប្រើ ប្រាស់បន្ទប់នេះ ដើម្បីច្របាច់ ឬបូមទឹកដោះ ហើយរក្សាទុកទឹកដោះរបស់ខ្លួននៅក្នុងទូរទឹកកក មុនពេលយកវាត្រឡប់ទៅផ្ទះវិញក៏បាន ។ 

ស្របនឹងទស្សនៈវិស័យគាំទ្រព្រមទាំងលើកទឹកចិត្តម្តាយឱ្យបំបោះកូនដោយទឹកដោះម្តាយតែមួយមុខគត់ពីអាយុសូន្យដល់ ៦ខែ អ្នកស្រីបណ្ឌិត Sanne Sigh តំណាងគម្រោង MUSEFO នៃអង្គការ GIZ មានប្រសាសន៍ថា តាមការកត់សម្គាល់ បច្ចុប្បន្នស្ត្រី និ ង និយោជិតជាស្ត្រីកំពុង ចំណាយពេលវេលាពួកគេភាគច្រើននៅកន្លែងធ្វើការ ហើយកន្លែងធ្វើការជាទីតាំងសំខាន់សម្រាប់ស្ត្រីបំបៅដោះកូនដោយទឹកដោះម្តាយ ។

“កន្លែងធ្វើការបានក្លាយទៅជាផ្នែកដ៏សំខាន់សម្រាប់អាហារូបត្ថម្ភ និងសុខភាពរបស់មាតា កុមារ អាហារូបត្ថម្ភ និងសុខភាពរបស់និយោជិតទូទៅ ។ បន្ទប់សម្រាប់បំបៅដោះកូនពុំមែនផ្តល់ប្រយោជន៍សម្រាប់តែបុគ្គលិកជាស្រ្តី ឬម្តាយប៉ុណ្ណោះទេ វាថែមទាំងផ្តល់សុខភាព និងការអភិ វឌ្ឍន៍ សម្រាប់កុមារ ផ្តល់អត្ថប្រយោជន៍ដល់ក្រុមការងារទាំងមូល ដែលជួយដល់ការអភិវឌ្ឍន៍ប្រកបដោយចីរភាពរបស់ប្រទេសជាតិ” ។ នេះបើតាមអ្នកស្រីបណ្ឌិត Sanne Sigh តំណាងគម្រោង MUSEFO នៃអង្គការ GIZ ។ 

សូមជម្រាបថា ប្រទេសកម្ពុជាបានប្តេជ្ញានឹងបង្កើនអត្រាការបំបៅកូនដោយទឹកដោះម្តាយតែមួយមុខគត់សម្រាប់ទារក និងកុមារអាយុពីសូន្យដល់ ៦ខែឱ្យបានដល់ ៨៥% នៅឆ្នាំ២០៣០ ដើម្បីលើកកម្ពស់សុខភាព ការលូតលាស់រាងកាយ និងការអភិវឌ្ឍន៍សតិបញ្ញា ស្មារតី របស់កុមារ កម្ពុជា ។ បើតាមរបាយការណ៍អង្កេតសុខភាព និងប្រជាសាស្ត្រកម្ពុជា ឆ្នាំ២០១៤ បានបង្ហាញថា អត្រាបំបៅកូនដោយទឹកដោះម្តាយតែមួយមុខគត់នៅកម្ពុជា មាននិន្នាការធ្លាក់ចុះគួរឱ្យព្រួយបារម្ភពីអត្រា ៧៤% នៅឆ្នាំ២០១០ ទៅ ៦៥% នៅឆ្នាំ២០១៤ ដោយក្នុងនោះមានការធ្លាក់ចុះយ៉ាងខ្លាំង នៅតំបន់ទីប្រជុំជនពីអត្រា ៦៤% ទៅ ៣៤% ។ ចំណែក ការរៀបចំបន្ទប់បំបៅដោះកូននៅកន្លែងធ្វើការ គឺស្របតាមមាត្រា១៨៤, ១៨៥, និង១៨៦ នៃច្បាប់ការងាររបស់ព្រះរាជាណាចក្រកម្ពុជា ៕