ភ្នំពេញ - ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានលើកឡើងថា អង្គការ UNICEF ជាដៃគូដ៏សំខាន់របស់រាជរដ្ឋាភិបាល និងជាដៃគូចម្បងជាមួយក្រសួងអភិវឌ្ឍន៍សម្រាប់ដំណើរការអភិវឌ្ឍវិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា ។ ការលើកឡើងនេះ នៅក្នុងឱកាសលោក Will Praks ប្រធានអង្គការមូលនិធិអង្គការសហប្រជាជាតិ (UNICEF) ប្រចាំនៅកម្ពុជា បានជួបសំដែងការគួរសម និងពិភាក្សាការងារ កាលថ្ងៃទី០២ ខែមីនា ឆ្នាំ២០២៣ នៅទីស្តីការក្រសួងអភិវឌ្ឍន៍ជនបទ ។

បណ្ឌិតសភាចារ្យរដ្ឋមន្រ្ដីក្រសួងអភិវឌ្ឍន៍ជនបទ បានថ្លែងអំណរគុណអង្គការ UNICEF ក្នុងកិច្ចសហប្រតិបត្តិការជាមួយក្រសួងលើវិស័យផ្គត់ផ្គង់ទឹកស្អាត និងអនាម័យជនបទ រហូតសម្រេចបានសមិទ្ធផលរួមគ្នា ។ ជាក់ស្តែងកន្លងទៅ អង្គការ UNICEF បានចូលរួមយ៉ាងសកម្មលើកិច្ចការបញ្ចប់ការបន្ទោបង់ពាសវាលពាសកាល (ODF) នៅខេត្តស្វាយរៀង ព្រៃវែង និងខេត្តកណ្ដាល ហើយឆាប់ៗខាងមុខក្រសួងនឹងប្រកាសជាផ្លូវការ ខេត្តកំពង់ស្ពឺជាខេត្តទី៤ បានបញ្ចប់ការបន្ទោបង់ពាសវាលពាសកាល (ODF) ។

លោក Will Praks ប្រធានអង្គការមូលនិធិអង្គការសហប្រជាជាតិ (UNICEF) ប្រចាំនៅកម្ពុជា អង្គការ UNICEF នឹងបន្តកិច្ចសហប្រតិបត្តិការជាមួយរាជរដ្ឋាភិបាល ជាពិសេស គឺក្រសួងអភិវឌ្ឍន៍ជនបទដើម្បីទទួលបានសមិទ្ធផលថ្មីៗបន្ថែមទៀត ។ អង្គការ UNICEF កំពុងគិតគូរដល់ភាពធន់ និងការប្រែប្រួលអាកាសធាតុទាក់ទិន ទៅនឹងការអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា ។ ជាមួយគ្នានេះ UNICEF ក៏នឹងត្រួតពិនិត្យឡើងវិញនូវឯកសារគោលនយោបាយ ក៏ដូចជាផែនការយុទ្ធសាស្រ្ដជាតិវិស័យផ្គត់ផ្គង់ទឹកស្អាត និងអនាម័យជនបទ ដើម្បីរួមគ្នាជំរុញវិស័យនេះឱ្យកាន់តែមានប្រសិទ្ធភាព ៕