ភ្នំពេញ - ឈរលើទស្សនវិស័យប្រែក្លាយខ្លួនជាក្រុមហ៊ុនផ្សព្វផ្សាយព័ត៌មានដ៏មានសក្តានុពលនៅកម្ពុជា បណ្តាញព័ត៌មាន APSARA MEDIA SERVICES (AMS) មានមហិច្ឆតាបង្ហាញមាតិកាព័ត៌មានដ៏ទូលំទូលាយ សំបូរបែប និងមានគុណប្រយោជន៍សម្រាប់សាធារណជន ដោយផ្សារភ្ជាប់ជាមួយប្រជាជនគ្រប់លំដាប់ថ្នាក់ក្នុងប្រទេស និងពិភពលោក ។ ទន្ទឹមគ្នានេះ ក្រុមហ៊ុន AMS បានបង្កើតមជ្ឈមណ្ឌលបំពេញការងារប្រមូលផ្តុំដោយទំនើបកម្មប្រព័ន្ធផ្សព្វផ្សាយ និងបច្ចេកទេសផ្សាយផ្ទាល់ រៀបចំតាមស្តង់ដារបច្ចេកវិទ្យា Full-HD និងអាចផលិតជារូបភាព 4K ដែលមានសក្តានុពលខ្ពស់ក្នុងការលើកកម្ពស់អាជីវកម្មនៅកម្ពុជាឱ្យទាន់និន្នានៃការរីកចម្រើនបច្ចេកវិទ្យាជាមួយបណ្តាប្រទេសនានាក្នុងតំបន់ និងសកលលោក ។ 

នេះបើតាមប្រសាសន៍របស់លោកជំទាវ ឌិត នីតា ប្រធានក្រុមប្រឹក្សាភិបាលក្រុមហ៊ុនអប្សរា មេឌាសីវីស (APSARA MEDIA SERVICES) នៅក្នុងកម្មវិធីសម្ពោធប្រើប្រាស់ការិយាល័យព័ត៌មានថ្មីរបស់ក្រុមហ៊ុន AMS ជាផ្លូវការ នៅថ្ងៃសុក្រ ទី២៩ ខែមីនានេះ ។ ជាមួយគ្នានេះដែរ រយៈពេលបីឆ្នាំចុងក្រោយ ដោយគិតមកដល់ដើមឆ្នាំ២០២៤ បណ្តាញព័ត៌មាន AMS បានកែទម្រង់លើមធ្យោបាយផ្សព្វផ្សាយរបស់ខ្លួនតាមប្រព័ន្ធចម្រុះ ទាំងប្រព័ន្ធផ្សព្វផ្សាយបែបប្រពៃណី និងប្រព័ន្ធផ្សព្វផ្សាយបែបឌីជីថល ។ ស្ថានីយ៍វិទ្យុ និងទូរទស្សន៍អប្សរា ព្រមទាំងបណ្តាញព័ត៌មាន AMS ទាំងអស់កំពុងអភិវឌ្ឍន៍ខ្លួនទៅតាមបរិបទសង្គមសម័យទំនើប និងកំពុងទទួលបានចំណាប់អារម្មណ៍ខ្ពស់ពីសាធារណជន ។

លោកជំទាវ ឌិត នីតា ប្រធានក្រុមប្រឹក្សាភិបាលក្រុមហ៊ុនអប្សរា មេឌាសីវីស មានប្រសាសន៍បន្តថា អស់រយៈពេល ៣០ឆ្នាំមកហើយ រាប់តាំងពីឆ្នាំ១៩៩៤ មកដល់បច្ចុប្បន្ន ស្ថានីយវិទ្យុ និងទូរទស្សន៍អប្សរា បានឈរជើងឆ្លងកាត់ប្រវត្តិសាស្រ្តរួមចំណែកជាមួយប្រជាជនកម្ពុជាក្នុងផ្សព្វផ្សាយមាតិការព័ត៌មានអប់រំ ព័ត៌មានកម្សាន្ត និងព័ត៌មានកីឡាយ៉ាងទូលំទូលាយ ដូចជាវិទ្យុ FM97 MHz និង FM99 MHz ទូរទស្សន៍អប្សរាប៉ុស្តិ៍លេខ១១ (TV11) ។ ពេលនេះក្រុមហ៊ុនអប្សរា មេឌាសីវីស បានប្រែក្លាយប្រព័ន្ធផ្សាយទូរទស្សន៍ពីគុណភាពរូប SD មក Full-HD និងកំពុងទំនើបកម្មឌីជីថលថ្មីៗ ស្របតាមគោលនយោបាយរបស់រាជរដ្ឋាភិបាល ។

លោកជំទាវ ឌិត នីតា បានបញ្ជាក់ថា ក្រុមហ៊ុនអប្សរា មេឌាសីវីស បានបង្កើតប្រព័ន្ធផ្សព្វផ្សាយទំនើបតាមបែបឌីជីថលឈ្មោះថា AMS កាលពីឆ្នាំ២០២០ ។ បណ្តាញផ្សព្វផ្សាយ AMS បានកសាងឡើងដោយបំពាក់នូវសម្ភារៈបច្ចេកទេសស្របតាមបរិបទឌីជីថល និងគោលគំនិតនវានុវត្តន៍ ដូចនៅតាមបណ្តាប្រទេសជឿនលឿននានាលើសកលលោក ដើម្បីបំពេញតាមតម្រូវការរសជាតិថ្មីដល់ទីផ្សារក្នុងស្រុកនាពេលបច្ចុប្បន្ន ។

ស្របគ្នានេះដែរ រយៈពេលបីឆ្នាំចុងក្រោយនេះ បណ្តាញព័ត៌មាន AMS បានក្លាយជាដៃគូផ្សព្វផ្សាយដ៏ចម្បងសម្រាប់កិច្ចសហការផ្សព្វផ្សាយ ផលិកម្មវិធី ឬរៀបចំព្រឹត្តិការណ៍ធំៗ ជាមួយក្រសួង ស្ថាប័ន គ្រឹះស្ថានសាធារណៈ និងវិស័យឯកជននានា ។ បណ្តាញព័ត៌មាន AMS កំពុងផ្ដោតសំខាន់លើការផលិតមាតិកាព័ត៌មាន និងផ្សព្វផ្សាយព័ត៌មានតាមរយៈប្រព័ន្ធឌីជីថល រួមមាន បណ្ដាញព័ត៌មានអប់រំ (AMS Education), បណ្ដាញព័ត៌មានសេដ្ឋកិច្ច (AMS Economy), បណ្ដាញព័ត៌មានអរិយធម៌ខ្មែរ (AMS Khmer Civilization), បណ្ដាញព័ត៌មានកីឡា (AMS Sports), បណ្ដាញព័ត៌មានកម្សាន្ត (AMS Infotainment), និងបណ្ដាញព័ត៌មានខ្លីខ្លឹមខ្លាំង (AMS One Minute) ។ 

បន្ថែមលើនេះ បណ្តាញព័ត៌មាន AMS បានបង្កើតកម្មវិធីព័ត៌មានពិសេសជាច្រើនទៀត ដូចជា កម្មវិធី AMS Politico 360, កម្មវិធី AMS សច្ចធម៌ប្រវត្តិសាស្ត្រ, និងកម្មវិធីកម្ពុជាមាតុភូមិខ្ញុំជាដើម ។ បណ្តាញព័ត៌មាន AMS ក៏បានសហការជាមួយបណ្តាញទូរទស្សន៍ឌីជីថល ទូរទស្សន៍ផ្កាយរណប ទូរទស្សន៍ខ្សែកាបនៅរាជធានីភ្នំពេញ និងទូរទស្សន៍នៅបណ្តាខេត្តមួយចំនួនក្នុងស្រុក ដើម្បីពង្រីកសក្តានុពលនៃការផ្សព្វផ្សាយកាន់តែធំទូលាយ ។ លើសពីនេះ AMS ក៏បានការសហការផ្លាស់ប្តូរព័ត៌មានជាមួយវិទ្យុ និងទូរទស្សន៍បរទេសមួយចំនួនផងដែរ ដូចជា វិទ្យុ និងទូរទស្សន៍មជ្ឈឹមចិន តាមរយៈវិទ្យុមិត្តភាពកម្ពុជា-ចិន (CCFR) វិទ្យុបារាំងអន្តរជាតិ (Rfi) រួមទាំងស្ថាប័នផលិតកម្មល្បីៗ និងក្រុមផលិតមាតិកាដែលមានប្រជាប្រិយភាព (Influencers) ជាដើម។

សូមជម្រាបថា ក្រុមហ៊ុនអប្សរា មេឌាសីវីស បានសម្ពោធដាក់ឱ្យប្រើប្រាស់អគារការិយាល័យព័ត៌មានថ្មីរបស់ខ្លួន រួមជាមួយពិធីអបអរសាទរខួប ៣០ឆ្នាំរបស់ស្ថានីយវិទ្យុ និងទូរទស្សន៍អប្សរា និងខួប០៣ ឆ្នាំរបស់បណ្តាញព័ត៌មាន AMS ។ រយៈពេលជាង ៣០ឆ្នាំកន្លងទៅ ក្រុមហ៊ុនអប្សរាព័ត៌មាន បានខិតខំបំពេញការងារអាទិភាព និងកំណែទម្រង់ស៊ីជម្រៅលើកិច្ចការជាច្រើន ដើម្បីធានាដំណើរការផ្សព្វផ្សាយ និងការផ្សព្វផ្សាយប្រកបដោយនិរន្តរភាពក្នុងទីផ្សារសោតទស្សន៍នៅកម្ពុជា ។ ស្ថានីយវិទ្យុ និងទូរទស្សន៍អប្សរា ត្រូវបានបង្កើតឡើងនៅក្នុងអំឡុងឆ្នាំ១៩៩៤ បន្ទាប់ពីប្រទេសកម្ពុជាបានដំណើរការបោះឆ្នោតសកលលើកដំបូង ដែលរៀបចំដោយអ៊ុនតាក់ក្នុងឆ្នាំ១៩៩៣ ៕