អ្នកជំនាញចាត់ទុកប្រព័ន្ធផ្សព្វផ្សាយមានឥទ្ធិពលវិជ្ជមានលើកកម្ពស់ចំណេះដឹងបំបៅកូនដោយទឹកដោះម្តាយ
ភ្នំពេញ - លោកស្រី Kirsty Milev នាយិកាផ្នែកគុណភាពកម្មវិធីនៃអង្គការទស្សនៈពិភពលោកអន្តរជាតិ ប្រចាំនៅកម្ពុជា មានប្រសាសន៍ថា ប្រព័ន្ធផ្សព្វផ្សាយតួនាទីសំខាន់លើកកម្ពស់ការបំបៅកូនដោយទឹកដោះម្តាយ និងផ្តល់ព័ត៌មានលើការបង្កើតគោលនយោបាយនៅកម្ពុជា ។ ការគិតគូរដល់ប្រព័ន្ធផ្សព្វផ្សាយជារឿងមិនអាចមើលរំលងបានក្នុងការអភិវឌ្ឍន៍សង្គម ។
ការលើកឡើងរបស់លោកស្រី Kirsty Milev នាយិកាផ្នែកគុណភាពកម្មវិធីនៃអង្គការទស្សនៈពិភពលោកអន្តរជាតិ ប្រចាំនៅកម្ពុជា នៅក្នុងកម្មវិធីប្រគល់រង្វាន់លើកទឹកចិត្តប្រកួតប្រជែងសរសេរអត្ថបទសម្រាប់អ្នកសារព័ត៌មានឆ្នើម ក្រោមប្រធានបទ “បង្កើតបរិយាកាសងាយស្រួលនៅកន្លែងការងារ ដើម្បីលើកកម្ពស់ការចិញ្ចឹមកូនដោយទឹកដោះម្តាយ” នារសៀលថ្ងៃទី២១ ខែកញ្ញា នៅសណ្ឋាគាកាំបូឌីយ៉ាណា រាជធានីភ្នំពេញ ។
ទន្ទឹមគ្នានេះ លោកស្រី Kirsty Milev បានបញ្ជាក់បន្ថែមថា ការផ្សព្វផ្សាយព័ត៌មានស្តីពីការបំបៅកូនដោយទឹកដោះម្តាយជួយលើកកម្ពស់ការយល់ដឹង និងតម្រូវការព័ត៌មានសម្រាប់ការបង្កើតគោលនយោបាយ និងកម្មវិធីនានា ដើម្បីគាំទ្រដល់ការបំបៅកូនដោយទឹកដោះម្តាយ ។ កិច្ចការងារនេះក៏អាចជួយលុបបំបាត់ព័ត៌មានមិនត្រឹមត្រូវ និងការយល់ដឹងខុសអំពីការបំបៅកូនដោយទឹកដោះម្តាយ ហើយជំនួសមកវិញនូវព័ត៌មានត្រឹមត្រូវអំពីរបៀបចិញ្ចឹមកូនដោយទឹកដោះម្តាយដល់ម្តាយឪពុក និងសមាជិកគ្រួសារ ។
សូមជម្រាបថា កម្មវិធីប្រគល់រង្វាន់លើកទឹកចិត្តប្រកួតប្រជែងសរសេរអត្ថបទសម្រាប់អ្នកសារព័ត៌មានឆ្នើម ក្រោមប្រធានបទ “បង្កើតបរិយាកាសងាយស្រួលនៅកន្លែងការងារ ដើម្បីលើកកម្ពស់ការចិញ្ចឹមកូនដោយទឹកដោះម្តាយ” បានសហការរៀបចំដោយអង្គការទស្សនៈពិភពលោកអន្តរជាតិ ប្រចាំនៅកម្ពុជា (WVI-C, យូនីសេហ្វ (UNICEF), អង្គការសុខភាព ពិភពលោក (WHO), គម្រោង Alive & Thrive នៃអង្គការ FHI360 (A&T/FHI360, អង្គការហេឡែន ខេលល័រ (Helen Keller Int’l), អង្គការភ្លែនអន្តរជាតិនៃកម្ពុជា (PIC), និងសម្ព័ន្ធដើម្បីអាហារូបត្ថម្ភកាន់តែប្រសើរឡើងនៅកម្ពុជា (SUN-CSA) ។
គោលបំណងកម្មវិធីប្រកួតប្រជែងសរសេរអត្ថបទសម្រាប់អ្នកសារព័ត៌មាន គឺ (១) បង្ហាញពីឥទ្ធិពលជាវិជ្ជមានលើគោលនយោបាយទាក់ទងនឹងការលើកកម្ពស់ការបំបៅកូនដោយទឹកដោះម្តាយ, (២) បង្កើនការយល់ដឹងពីបញ្ហាប្រឈមរបស់ម្តាយក្នុងប្រទេសកម្ពុជាដែលមានបំណងបំបៅកូនដោយទឹកដោះម្តាយតែមួយមុខគត់សម្រាប់រយៈពេលប្រាំមួយខែដំបូងបន្ទាប់ពីសម្រាលរួច និងការបន្តបំបៅកូនដោយទឹកដោះម្តាយឱ្យបានយូរ, និង (៣) ការផ្តល់ដំណោះស្រាយដែលអាចទៅរួចសម្រាប់ម្តាយដែលត្រូវបំពេញកិច្ចការងារ ដើម្បីជំនះឧបសគ្គចំពោះការបំបៅកូនដោយទឹកដោះម្តាយ ៕